«Ամբողջությամբ կիսում եմ այն ապրումները, որոնք յուրաքանչյուրն ունեցել է այդ տեսանյութը դիտելիս: Անթույլատրելի ու զազրելի է այն ամենն, ինչ ներկայացվեց»,- խորհրդարանում լրագրողների հետ զրույցում ասաց ԱԺ ՀՀԿ-ական փոխնախագահ Արփինե Հովհաննիսյանը`անդրադառնալով ՀՀԿ խմբակցության պատգամավոր, գեներալ Մանվել Գրիգորյանի առանձնատանը ԱԱԾ անցկացրած ստուգումներին եւ բացահայտումներին։
Վաղը խորհրդարանի արտահերթ նիստում կքննարկվի Մանվել Գրիգորյանին անձեռնմխելիությունից զրկելու հարցը: Թեեւ քվեարկությունը փակ է լինելու, բայց Արփինե Հովհաննիսյանը լրագրողների հարցերին ի պատասխան ասաց, որ ինքը «կողմ» է քվեարկելու: «Կարծում եմ՝ ճիշտ է, որպեսզի հնարավորություն տրվի լրիվ օբյեկտիվ ու բազմակողմանի քննություն իրականացնելու»,- ասաց : «Առավոտի» ունեցած տեղեկություններով՝ կողմ է քվեարկելու ՀՀԿ ողջ խմբակցությունը՝ այսօր Սերժ Սարգսյանի ղեկավարությամբ գումարված նիստում ձեռք բերված պայմանավորվածության համար:
Aravot.am-ի հարցին`միայն Մանվել Գրիգորյա՞նը պետք է պատասխանատվության ենթարկվի, Արփինե Հովհանիսյանը պատասխանեց`բոլոր նրանք, ովքեր մասնակից են եղել այս գործընթացին՝ անկախ նրանից, թե ինչ պաշտոն են զբաղեցրել կամ զբաղեցնում, այս պահին որտեղ են գտնվում, պետք է պատասխանատվության ենթարկվեն. «Եթե նախաքննության ընթացքում պարզվի, որ որեւէ մեկն այս ամենին մասնակից է եղել եւ այս ամենը իրականությանը համապատասխանում է, բոլորը պետք պատասխան տան»:
Մանրամասները` տեսանյութում
Նելլի ԳՐԻԳՈՐՅԱՆ
