ՀՀԿ խմբակցության պատգամավոր Մանվել Գրիգորյանի ամառանոցում երեկ ԱԱԾ-ի հայտնաբերածն, ըստ «Ծառուկյան» խմբակցության քարտուղար Վահե Էնֆիաջյանի, ակնհայտ են դարձնում, թե ինչպիսի ստոր գործողություններ են իրականացվել զինվորի եւ բանակի նկատմամբ: Խորհրդարանական ճեպազրույցներում այսօր պատգամավորն ասաց`նման անձինք օրենքի ամբողջ խստությամբ պետք է պատասխանատվության ենթարկվեն:
Հարցին՝ ինչպե՞ս կքվեարկեն Մանվել Գրիգորյանին պատգամավորական անձեռնմխելիությունից զրկելու հարցին, Վահե Էնֆիաջյանը պատասխանեց. «Մենք մեր խմբակցությունում որոշում դեռեւս չենք կայացրել, բայց նման գործելաոճի պարագայում էլ ուրիշ ի՞նչ վերաբերմունք պետք է լինի»։
Aravot.am-ի հարցին`«Ծառուկյան» խմբակցությունում էլ կան պատգամավորներ, որոնց մասով մամուլում բազմաթիվ հրապարակումներ են եղել տարբեր հանցագործությունների հետ կապված, ինչպե՞ս է պատկերացնում, որ նրանք «կողմ» քվեարկեն, Վահե Էնֆիաջյանն ասաց, որ նախ փաստեր են պետք, ապա`խմբակցության որոշումները բոլորի համար պարտադիր կատարման ենթակա են: Դիտարկմանը`փաստեր կարող են բոլորի մասով էլ ի հայտ գալ եւ ի վերջո, այս քվեարկությունը նախադեպ կարող է դառնալ, պատգամավորը հակադարձեց` Հայաստանում բոլորը պետք գիտակցեն, որ քաղաքական իրավիճակ է փոխվել, իսկ ժողովուրդն ու ներկայիս իշխանությունը վճռական են, որպեսզի օրենքի գերակայություն լինի։
Մանրամասները՝ տեսանյութում
Լրագրողներից մեկը հիշեցրեց` տարիներ շարունակ ԲՀԿ-ն աջակցել է ՀՀԿ-ին, նրանց հետ կոալիցիա է կազմել, սատարել է Սերժ Սարգսյանի թեկնածությանը եւ հարցրեց` ստեղծված իրավիճակի համար իրենց մեղավոր զգո՞ւմ են:
«Դուք դեռևս 2007 թվականի գործընթացի մասին եք խոսում, երբ ԲՀԿ-ն կոալիցիայի մաս էր ՀՀԿ-ի հետ: ԲՀԿ-ն փորձել է իր ամբողջ ներուժը օգտագործել ի շահ երկրի: Երբ տեսել ենք` ինչ է կատարվել, դուրս ենք եկել եւ ընդդիմադիր դաշտում պատվավոր դեր ենք զբաղեցրել»,- ասաց Վահե Էնֆիաջյանը:
Գեւորգ Պետրոսյանն էլ ասաց` տվյալ քաղաքական ուժը ներկայացնող առանձին գործիչների գործողությունների համար ԲՀԿ-ն պատասխանատու չէ: ԲՀԿ-ն պատասխանատու է իր անդամների քաղաքական գործողությունների համար, իսկ կոնկրետ անձինք պատասխանատվություն են կրում իրենց գործած արարքների համար:
Մանրամասները`տեսանյութում
Նելլի ԳՐԻԳՈՐՅԱՆ
