«Մարդ իրա աչքի տեսածին չի էլ կարողանում հավատալ»,- սա ՀՅԴ-ական պատգամավոր, խմբակցության ղեկավար Արմեն Ռուստամյանի առաջին արձագանքն է այն ամենին, ինչ, որ տեսել է նախօրեին, ՀՀԿ խմբակցության պատգամավոր Մանվել Գրիգորյանի վերաբերյալ ԱԱԾ-ի տարածած հաղորդագրությամբ: «Եթե այս ամենն այնպես է, ինչպես տեսանք, դա մեկնաբանության կարիք էլ չունի»,- այսօր խորհրդարանական ճեպազրույցների ժամանակ ասաց Արմեն Ռուստամյանը: Իրեն այլ բան է անհանգստացնում`ադրբեջանական համայնքի հրճվանքը. «Մանվել Գրիգորյանը մեծ դերակատարում է ունեցել Արցախյան ազատամարտում, ազատագրել է տարածքներ: Սա ինչպե՞ս պետք է ներկայացնեն նրանք, Արցախի հերոս է, ինչպե՞ս պետք է փորձեն վարկաբեկել` սա է իմ ամենամեծ ցավը: Էս ամեն ինչը ինչպե՞ս պետք է կարողանանք մարսել»:
Ինքը ցավ է ապրում, ասում է`«ապշած, ցնցվածը քիչ է»: Չի հասկանում`ինչո՞ւ են այդ նամակները գտնվում այդտեղ, տրամաբանական բացատրություն չի կարող լինել այս ամենին: Սակայն, նկատում է, որ կա անմեղության կանխավարկած եւ ամենն օրինականության սահմաններում պետք է լինի. «Մենք հետամուտ ենք լինելու, որ ամեն ինչ կատարվի օրենքի տառին համապատասխան: Նյութերն ավելի խորը կուսումնասիրենք, այս պահին անձեռնմխելիություն կա, կա նաեւ անմեղության կանխավարկած: Այս ամենը նկատի ենք ունենալու: Սա շատ մեծ հարված էր մեր անցած համատեղ գործունեությանը, հարաբերություններին: Ես կարծում եմ, որ պետք է կարողանանք այնպես չանել, որ փորձ արվի թշնամիների կողմից այս ամենը ներկայացվի իրենց օգտին»:
Այլ մանրամասները` տեսանյութում
Արմեն Ռուստամյանը հիշեցնում է`ապրիլյան քառօրյա պատերազմից հետո, խորհրդարանում տեղի ունեցած փակ հանդիպումների ժամանակ իրենք բարձրաձայնել են բանակի սննդի ու հագուստի հետ կապված հարցեր. «Գնացել ենք առաջնագիծ, տեսել ենք սնունդը: Այդ սնունդը բացում, գցում էին շների դեմը, շները չէին ուտում: Էտիկետները բերել էինք ու այստեղ ներկայացրեցինք: Հարգելով այդ փակ հանդիպման կոնտեքստը՝ բոլոր մանրամասները չեմ ուզում ասել, առիթ ունեցել ենք խոսելու, խոսքը գնացել է բանակում հագուստի, սննդի, այլ պայմանների մասին: Այս ամենը բարձրաձայնվել է, դրանից հետո փոփոխություններ մտան, բայց երբ այս ամենը տեսնում ես… Ճիշտ կլինի, որ այս ամենը տեղը դնելու գործընթացն իր վերջնական նպատակին հասնի»:
Արմեն Ռուստամյանն ասում է. «Գործը այստեղ չպետք է կանգնի: Եթե գեներալ Մանվելը անձեռնմխելի չի, ճիշտ կլինի, որ որեւէ մեկը անձեռնմխելի չլինի եւ բանակը թափանցիկ ղեկավարել-կառավարելու գործընթացը պետք է ամբողջովին իրականացվի:
Լրագրողները հետաքրքրվեցին`լսե՞լ է պատմություններ, որ իննսունականներին Մանվել Գրիգորյանը նաեւ Արցախում, ազատագրված տարածքներում է թալան իրականացրել: Արմեն Ռուստամյանը պատասխանեց`բամբասանքներով չի զբաղվում. «Հիմա փաստերով ենք խոսում, դրանց համար էլ է փաստեր պետք»:
Ինչ վերաբերում է Մանվել Գրիգորյանին Արցախի հերոսի կոչումից զրկելուն, Արմեն Ռուստամյանն ասաց. «Ամեն ինչ չպետք է խառնել իրար: Մենք էլի ունեցել ենք ազգային հերոսներ, որ հայտնվել են ճաղերի հետեւում: Մենք, իհարկե, պետք է իրերն իրենց անուններով կոչենք եւ ամեն ինչ չծայրահեղացնենք»: Ասաց`անցյալի գնահատականները չպետք է խառնենք ներկայիս գնահատականների հետ:
Նելլի ԳՐԻԳՈՐՅԱՆ
Շատ մի մտահոգվեք, ադրբեջանցիների համար կոռուպցիան կենսակերպ է, իրենց ժողովուրդն ավելի վատ բաներ գիտի,պարզապես այդ մասին չեն հրապարակում, նրանց մոտ ամեն ինչ գաղտնի է, ով կհամաձավի մամուլում մեկ բառ գրել: Արտերկրում ապրող ադրբեջանցիները նախանձով են խոսում մեր երկրում տեղի ունեցեղ բացահայտումների մասին: Ասում են, երանի մեզ մոտ էլ մի Նիկոլ Փաշինյան լիներ: