ԱԱԾ-ի կողմից երեկ ներկայացված տեսանյութը դիտելուց հետո դժվար է գտնել որևէ բանական էակ, որ փորձի մեղմացուցիչ հանգամանքներ գտնել ԱԺ-ի պատգամավոր, ԵԿՄ-ի նախագահ, ՀՀ և Արցախի հերոս, լեգենդար զորավար Մանվել Գրիգորյանի գործողություններում:
Տարիներ շարունակ ՀՀ-ի 3-րդ նախագահ, ՀՀԿ-ի առաջնորդ Սերժ Սարգսյանը իշխանությանը և իր համակիրներին հորդորել է, որ կարևորը թղթերում ամեն ինչ կարգին լինի:
ԱԺ-ի վերահսկիչ պալատի նախկին նախագահ Իշխան Զաքարյանը հերթական տարեկան հաշվետվությունը տալիս բարձրաձայնել էր, որ բյուջեի կատարողականում մսխումը լուրջ տոկոս է կազմում: ՀՀ 3-րդ նախագահը հրապարակավ նրան կշտամբեց, սակայն որոշ կուսակիցներ հորդորին ականջալուր չեղան և թղթերը կարգի չբերեցին:
Արդյունքում ունեցանք այն, որ Մանվել Գրիգորյանը ոչ թե թղթերով կարգին չէր աշխատել, այլ պարզապես մարդկային որակներում տեղի էր տվել բնազդին և վերջ:
Դժվար է մտածել «լեգենդար հերոսը» գեթ մեկ ակնթարթ փորձել է իրեն հաշիվ տալ և հասկանալ, թե ինչ է անում:
Նա իր ապրած կյանքով ոչ միայն վարկաբեկեց իր ընտանիքին, կուսակիցներին, բանակին, ԵԿՄ-ին, այլև լուրջ հարված հասցրեց մատաղ սերնդի դաստիարակությանը:
Քառօրյա պատերազմից հետո հերոսական ճակատամարտ տված զինվորները սննդի, դեղորայքի պակասի պայմաններում հավատ են ունեցել, որ իրենց ուղարկված ծանրոցները տեղ կհասնեն: Փոխարենը Գյումրու դպրոցի տարրական դասարանների աշակերտների ծանրոցները հասել են մանվելի Արջերին…: Սա իրոք վերջն է:
Եվ հետաքրքիր է, թե տեսանյութը դիտելուց հետո ի՞նչ է մտածում ՀՀԿ-ի առաջնորդ Սերժ Սարգսյանը` լինելով նրա զինակիցը և ընտանիքի մտերիմը:
Կարծում եմ, ԱԺ-ի պատգամավոր Մանվել Գրիգորյանին պատգամավորական անձեռնամխելիությունից զրկելու հարցում ՀՀ դատախազի կողմից ներկայացված փաստարկների պայմաններում առաջինը ՀՀԿ-ն պետք է քվեարկի նման պատգամավորին անձեռնամխելիությունից զրկելու համար: Միայն այդ դեպքում ՀՀԿ-ն կարող է դառնալ կառուցողական ընդդիմություն: Հակառակ պարագայում կհայտնվի քաղաքական հարթակի լուսանցքում:
Կդատվի, թե չի դատվի Մանվելը` սա արդեն էական չէ, բայց նա պետք է զրկվի զինվորական կոչումներից և բարձրագույն պարգևներից:
Այլևս նման լեգենդար հերոսներ մեր ազգին պետք չեն:
Գառնիկ Վաղարշակյան
Հայաստանի բուհերի արհեստակցական
կազմակերպությունների ճյուղային
հանրապետական միության նախագահ
