Էջմիածնի քաղաքապետ Կարեն Գրիգորյանի հրաժարականը պահանջող «Ազատ քաղաքացի բաց ինստիտուտ» ՀԿ-ի ներկայացուցիչներն ու «Մերժի՛ր Կարենին» նախաձեռնության անդամները չներկայացան Արմավիրի մարզպետի մոտ հանդիպման: Այս մասին հայտարարեց Արմավիրի մարզպետ Գագիկ Միրիջանյանը: Երեկ մարզպետը քաղաքապետ Կարեն Գրիգորյանին եւ ընդդեմ քաղաքապետի բողոքի ցույցի կազմակերպիչներին զսպվածության կոչ էր արել, եւ առաջարկել հանդիպել իր հետ եւ քննարկել ցույցերը հանգուցալուծելու տարբերակներ: Մարզպետի հրավերն ընդունել էր Էջմիածնի քաղաքապետը եւ գնացել հանդիպման:
Միրիջանյանը լրագրողներին ասաց, որ իրենք սպասել են, սակայն քաղաքապետի հրաժարականը պահանջողներն այդպես չներկայացան. «Դեռ փակ չէ ոչ մի բան, պատրաստ ենք ընդունել բոլորին, զրուցել, հասկանալ: Քննարկեցինք բազմաբնույթ հարցեր, եւ ամենակարեւորը՝ եւս մեկ անգամ ես իմ դիրքորոշումն եմ արտահայտում, որն այսօր նաեւ պետության դիրքորոշումն է՝ հորդորում ենք պահպանել հասարակական կարգը՝ հարգելով բոլորի սահմանադրական իրավունքները: Մենք քաղաքապետի հետ քննարկեցինք նաեւ այդ հարցը, իրենք դադարեցնում են ցույցը եւ հացադուլը, այսինքն՝ վերադառնում են բնականոն կյանքին: Մնացածը եղել են զուտ աշխատանքային քննարկումներ՝ մանկապարտեզների իրավիճակ եւ այլն»:
Նելլի ԲԱԲԱՅԱՆ
Հ.Գ. Էջմիածնի քաղաքպետ Կարեն Գրիգորյանն էլ մարզպետի հետ հանդիպումից հետո հայտարարեց, որ դադարեցնում են բոլոր տեսակի գործողությունները. «Ընդունում ենք իշխանությունների կոչը եւ բաց ենք ցանկացած լսումների, քննարկումների համար»։
