«Երբ հետազոտության ժամանակ պարզում էինք մեր երկրորդ երեխայի սեռը, ասացի՝ հուսով եմ, որ երկրորդն էլ է աղջիկ: Բժիշկը շոկի մեջ էր. զարմացավ, թե ոնց կարող է տղամարդը ցանկանալ աղջիկ ունենալ»,-«Լոֆթ» ինքնազարգացման կենտրոնում քաղաքացիների հետ հարցուպատասխանի ժամանակ այսօր անդրադառնալով սեռով պայմանավորված աբորտներին, ասաց Առողջապահության նախարար Արսեն Թորոսյանը: Նրա բնորոշմամբ՝ ճիշտ չէ ակնկալել, որ մի օր բոլոր տղամարդիկ կփոխեն իրենց տեսակետը եւ իր պես կմտածեն:
Ըստ նախարարի՝ դեռ մանկապարտեզից պետք է երեխաներին ճիշտ մշակույթ սովորեցնել մարդկային հարաբերությունների մասին. «Եթե այդպես լինի, 25 տարի անց արդյունքի կհասնենք: Բայց ես համարում եմ, որ մենք այդքան էլ կնատյաց չենք, Հայաստանն ավելի լավ վիճակում է այդ առումով: Սեռով պայմանավորված աբորտներ չպետք է լինեն, բայց անգամ ամենակնամեծար երկրներում այդ խնդիրը լուծված չէ»: Ապա լրագրողներից մեկը հետաքրքրվեց, թե նախարարն ինչ կարծիքի է ոչ ավանդական բուժական մեթոդների, օրինակ՝ հոմեոպաթիայի եւ նարեկաբուժության մասին:
Արսեն Թորոսյանը պատասխանեց. «Կա գիտություն եւ մնացածը: Եթե ինչ-որ բան գիտության կողմից ապացուցված չէ, ապա տեղի չպետք է ունենա մեր կյանքում: Պետք է պարզել այդ մեթոդների՝ մասնագիտություն լինել-չլինելը: Զավեշտը չպետք է հասնի նրան, որ նարեկաբուժությամբ ՄԻԱՎ բուժեն»:
Լուիզա ՍՈՒՔԻԱՍՅԱՆ
