«Հարավկովկասյան երկաթուղու պոլիկլինիկա» պետական ՓԲԸ-ի տնօրեն Միսակ Նահապետյանն այսօր «Լոֆթ» ինքնազարգացման կենտրոնում Առողջապահության նորանշանակ նախարար Արսեն Թորոսյանի հետ հարցուպատասխանի ժամանակ բարձրաձայնեց, որ իր ղեկավարած հաստատությունը պետությունը ցանկանում է մասնավորեցնել, ինչը, ըստ տնօրենի, կխաթարի բուժհաստատության աշխատանքը: Արձագանքելով՝ Արսեն Թորոսյանը նախ տեղեկացրեց, որ նախորդ տարի տասնմեկ բուժհաստատություններ ներառվել են մասնավորեցման ցանկում. «Պետական պետք է լինեն այն ԲԿ-ները, որոնք ռազմավարական նշանակության ծառայություններ են մատուցում, որոնք, սակայն, եկամտաբեր չեն: Մասնավորեցման ցանկն առաջիկայում կետ առ կետ նայելու ենք եւ տեսնենք, թե որ բուժհաստատությունները պետք է հետ գան պետության տիրապետության ներքո»:
Ապա դիմելով Նահապետյանին՝ Արսեն Թորոսյանն ասաց. «Ձեր պոլիկլինիկան գուցե շատ կարեւոր գործ է կատարում, բայց այդ հարցում պետական լինել-չլինելն այդքան էլ էական չէ: Կարող եք շարունակել ձեր ծրագրերը եւ գործունեությունը եւ չլինել պետական»:
Ըստ նախարարի՝ նշյալ պոլիկլինիկան հատուկ ռազմավարական նշանակություն չունի, հետեւաբար, պետական մնալու պարտադիր պայման Արսեն Թորոսյանը չի տեսնում:
Լուիզա ՍՈՒՔԻԱՍՅԱՆ
