Հեղափոխությունը սկսեց խժռել իր զավակներին: Չգրված օրենքներն ավելի գործուն են, քան գրված ու գրվող օրենքները: Ավելի ճշգրիտ լինելու համար` հեղափոխությանը Հայաստանում սկսել են հակադարձել ուղեկիցները, որ վերջին պահին թռան գնացքի վերջին վագոնը ու իրենց հայտարարեցին համաժողովրդական շարժման մեջ:
Փաստացի` երբ էլ լինեն ԱԺ արտահերթ ընտրությունները, քարոզչությունն ու հակաքարոզչությունն արդեն սկսվել են: Շնորհիվ ԲՀԿ-ի: Ընդամենը մի քանի օր առաջ` կառավարության ծրագրի հաստատման ժամանակ, Նիկոլ Փաշինյանին քաղաքական սիրո երդումներ տվող ու ՀՀԿ-ի հաշվին հերոսացող խմբակցությունը 180 աստիճանով փոխեց իր դիրքորոշումը: Երեքշաբթի հայտարարությունների ժամը «Ծառուկյան» խմբակցությունը վերածեց Բարեգործության օրենքի մերժման ու Գագիկ Ծառուկյանի բենեֆիսի: Այսինքն` ԲՀԿ-ն հույս չունի առանց բարեգործության քաղաքական դաշտում, առավել ևս խորհրդարանում ապահովել իր ներկայությունը, ուր մնաց արդեն հնչած 50+1-ն ու մեծամասնությունը: Այսինքն` հեղափոխությունը հրապարակավ ընդունած ու իրեն հեղափոխական հայտարարած կուսակցությունը, որ նաև կառավարության մաս է, չի ընկալել ու համաձայն չէ հեղափոխության բովանդակության հետ: Այսինքն` ԲՀԿ-ն մնացել է այն հայրենիքում, որը կրկես էր, և ցանկություն չունի փոխել խաղի հին կանոնները` ընտրությունների «Վճարիր ու ստացիր» սկզբունքը, որ գործում էր ոչ միայն ՀՀԿ-ի համար, այդ սկզբունքով էր ԲՀԿ-ն դառնում ԱԺ երկրորդ ուժ: Պարբերաբար:
ԱԺ-ում հնչող ԲՀԿ-ականների հայտարարությունները տուրք էին հին ու իրենց համար բարի ժամանակներին, երբ թագավորը ընտրություններից առաջ լուծում էր հարցերը և բոլորն ունեին մեկ խնդիր` Գագիկ Ծառուկյանն իրենց հետ մյուսների դրդմամբ չթարսվեր: Նրանց մանդատ տվողը ԿԸՀ-ն չէր, այլ Գագիկ Ծառուկյանը, որ նաև մանդատ վերցնող էր` եթե դեռ հիշում եք 2017-ի ընտրություններին հաջորդած սկանդալները` ով է մանդատը ստանում, ով է Գագիկ Ծառուկյանի ոտքերի տակ դնում: Նրանք պատրաստ են կառավարությանը ու իրենց համար Գագիկ Ծառուկյանից հետո երկրորդ աստված հայտարարված Նիկոլ Փաշինյանին պատվանդանից վար բերել, որովհետև նա ձեռք է բարձրացրել սրբություն սրբոցի` բարեգործության ու համայն Հայաստանի թիվ 1 բարեգործ Գագիկ Ծառուկյանի չկանոնակարգված բարեգործության իրավունքի վրա:
Անահիտ ԱԴԱՄՅԱՆ
Հոդվածն ամբողջությամբ կարող եք կարդալ «Իրատես» թերթի այսօրվա համարում
