Հենրիխ Մխիթարյանը խորհուրդ է տալիս այցելել Արցախ

Հայաստանի հավաքականի և Լոնդոնի «Արսենալի» կիսապաշտպան Հենրիխ Մխիթարյանը Ֆուտբոլի աշխարհի առաջնությանն ընդառաջ մեկնել է Մոսկվա: Sport.ru-ը Մխիթարյանի հետ զրուցել է նրա նախասիրությունների և երազանքների մասին:

– Դուք խոսում եք 6 լեզվով՝ ռուսերեն, հայերեն, ֆրանսերեն, գերմաներեն, անգլերեն և պորտուգալերեն: Ուղղության տվեք մարդկանց՝ ինչպես դա անել:

– Գաղտնիք չկա: Հնարավորություն է եղել ապրել Ֆրանսիայում՝ սովորել եմ ֆրանսերեն: Եղել եմ Բրազիլիայում՝ սովորել եմ պորտուգալերեն: Խաղացել եմ Գերմանիայում՝ սովորել եմ գերմաներեն: Ամեն ինչ պարզ է. շփվում եմ, հարցեր եմ տալիս, գիրք եմ կարդում:

– 14 տարեկանում Դուք 4 տարի փորձաշրջան եք անցել «Սան Պաուլուում»: Ի՞նչն է Ձեզ զարմացրել ամենաշատը:

– Կյանքի բրազիլական մշակույթը, ամեն ինչ շատ նոր էր: Բոլորը գիտեն բրազիլական ուտելիքը՝ չուրասկո, բրինձ, լոբի, բանան: Հայաստանում նման բան չկա. այնտեղ միայն խորովածն է շամփուրի վրա:

– Մի զվարճալի պատմություն պատմեք Յուրգեն Կլոպի մասին:

– «Բորուսիայում» մի անգամ նա ասաց. «Եթե 6-7 գոլ խփես, քեզ վճարում եմ 50 եվրո, եթե ոչ՝ դու ես վճարում»: Ես գրազը տարվեցի, բայց երկու օր հետո մենք խաղ ունեինք «Ֆրանկֆուրտի» դեմ, հաղթեցինք 2:1 հաշվով, ես 2 գոլ խփեցի: Հաղթանակից հետո Կլոպն ինձ գրկեց ու ասաց. «Շատ շնորհակալ եմ քեզ ու շատ գոհ եմ»: «Այդ դեպքում վերադարձրու իմ 50 եվրոն»: Ստիպված էր վերադարձնել:

– Երևանն աշխարհի ամենալավ քաղա՞քն է:

– Ինձ համար Երևանն ամենալավն է: Այնտեղ են ապրում իմ ընկերները, բարեկամները, ընտանիքը: Այդ քաղաքն ինձ շատ է ուժ տալիս:

– Հայաստանում երեք այն գլխավոր վայրերը, որ պետք է այցելել:

– Առաջինը՝ Խոր Վիրապ. Դա Արարատ լեռան մոտ գտնվող վանք է: Հետո Գառնի, Գեղարդ վանական համալիրը և Ղարաբաղը:

– Կա՞ ինչ-որ երգ, որը լսում եք, երբ Ձեզ վատ եք զգում:

– Չկա այդպիսին: Երբ ինձ վատ եմ զգում, երգ չեմ լսում, պարզապես մտածում եմ:

– Հավանու՞մ եք System Of A Down-ը:

– Ես ռոքի մեծ երկրպագու չեմ, բայց քանի որ խմբի մենակատարը իմ համերկրացի Սերժ Թանկյանն է, այն ինձ շատ է դուր գալիս: Ցավոք, մենք նրա հետ դեռ չենք հանդիպել:

– Գլխավոր խորհուրդը, որ ձեզ տվել է Ձեր հայրը:

– Կարծում եմ, նա չհասցրեց ինձ որևէ խորհուրդ տալ, քանի որ ես 7 տարեկան էի, երբ նա մահացավ: Ցավոք, այդ տարիքում ես չէի կարող որևէ բան հասկանալ: Հետևաբար չեմ հիշում:

– Ձեր մայրիկի պատրաստած լավագույն ուտեստը:

– Չկա մեկ այդպիսի ուտեստ, բայց այնուամենայնիվ, խոզի միս՝ ռոքֆորի սոուսով:

– Նկարագրեք Լոնդոնի Ձեր տունը:

– Երեք սենյականոց բնակարան է հանգիստ թաղամասում, առանձնահատուկ ոչ մի բան: Գլխավորը՝ այնտեղ հարմար զգամ, որպեսզի անընդհատ տուն գնալու ցանկություն լինի:

– Ե՞րբ եք վերջին անգամ հավաքել բնակարանը:

– Երկու օր առաջ:

– Ինչո՞ւ է այդպես ստացվել:

– Որովհետև դա իմ բնակարանն է, ես ինքս պետք է այն կարգի բերեմ:

– Դուք բնակարանում շքեղություն ունե՞ք:

– Ես ինքս եմ:

– Իսկ Ձեզնի՞ց բացի:

– Չունեմ այդպիսին:

– Որտեղի՞ց եք հագուստ գնում:

– Վերջին անգամ գնել եմ Մյունխենում: Ավստրիայում հավաք էր, մենք երկու ընկերական խաղ ունեինք, առաջինից հետո մեզ ազատ օր տվեցին, և մենք ամբողջ թիմով գնացինք Մյունխեն: Այնտեղ էլ գնել եմ:

– Ի՞նչ ապրանքանիշեր եք սիրում:

– Չկան այդպիսիք: Չի կարելի ասել, որ օգտվում եմ կոնկրետ ապրանքանիշերից: Ամենակարևորը՝ որ ինձ դուր գա շապիկը, ջինսը և այլն:

– Ի՞նչ հագուստ եք կրում:

– Բրենդային, բայց հասարակ:

– Պատմեք Իբրահիմովիչի մասին պատմությունը, որը ոչ մեկ չգիտի:

– Մի անգամ նրան հարցրի. «Ե՞րբ ազատ կլինես, որպեսզի ընթրենք»: «Արի այսօր՝ անմիջապես մարզումներից հետո»: «Տեղ ընտրիր, ես սեղան կպատվիրեմ»: «Ես գլուխ չեմ հանում Մանչեսթերի կենտրոնից, այնպես որ ինքդ որոշիր»,- պատասխանեց Իբրան: Այդպես, գնացինք հայկական ռեստորան, Զլատանը խորոված կերավ: Իսկ երկու օրից մենք Եվրոպայի լիգայում խաղում էինք «Սենթ Էթիենի» դեմ, և նա հեթ-թրիկ արեց:

– Ե՞րբ եք վերջին անգամ մետրոյով երթևեկել:

– Մետրոյո՞վ: Ուաու: Երևի 15 տարի առաջ Երևանում:

– Երբ խաղում էիք «Շախտյորում», Դոնեցկում ինչո՞վ էիք երթևեկում:

– Ես ունեի ակումբից Hyundai և շատ գոհ էի:

– Ինչո՞վ եք երթևեկում հիմա:

– GLA սերիայի Mercedes-ով. իմ ամենօրյա մեքենան է:

– Մեքենան, որի մասին երազում եք:

– Տրակտոր: Դա ամենալավ մեքենան է: Կատակում եմ: Իրականում մեքենան, որի մասին երազում եմ, արդեն ունեմ. դա Lamborghini Aventador-ն:

– «Արսենալի» խաղացողների հետ չաթ ունե՞ք:

– Այո, WhatsApp-ում:

– Ուրա՞խ է այնտեղ:

– Ամենազվարճալին Ալեքսանդ Լյակազետի կողմից էր, երբ նա հայտնվել էր աշխարհի առաջնությունում: Իսկ թե ինչ էր՝ արդեն գաղտնիք է:

– Ի՞նչ երազանք ունեք:

– Դրանք շատ են: Եվ ամեն անգամ, երբ ես հասնում եմ մի երազանքին, ինձ մոտ առաջանում է մյուսը: Ես երբեք կանգ չեմ առնում նրա վրա, ինչին արդեն հասել եմ:

Առաջին երազանքն է լինել լավ մարդ: Երկրորդը՝ ընտանիք ու երեխաներ: Մնացածն ինքնըստինքյան կգա:

Պատրաստեց՝ Վիկտորյա ԱՆԴՐԵԱՍՅԱՆԸ