«Գործի բերումով ես Սմբատին ճանաչում եմ արդեն մոտ քսան տարի, երբ նա աշակերտ էր և ես «Կրթություն» թերթի խմբագիր: Սմբատը մաթեմատիկայի համաշխարհային օլիմպիադայից մեդալ էր նվաճել: Իսկ դա խաղուպար չէ: Սմբատը տաղանդավոր տղա է»,-խոսելով Բարձրագույն որակավորման հանձնաժողովի (ԲՈՀ) նորանշանակ նախագահ Սմբատ Գոգյանի մասին`հայտարարեց կրթության փորձագետ Սերոբ Խաչատրյանը:
Հիշեցնենք՝ ՀՀ վարչապետ Նիկոլ Փաշինյանի՝ հունիսի 11-ի որոշմամբ Սմբատ Գոգյանը նշանակվել է Բարձրագույն որակավորման հանձնաժողովի նախագահ:
Պարոն Խաչատրյանը հայտնեց, թե սկզբունքորեն այն մոտեցման կողմնակիցն է, որ պետք է որոշակի քվե տալ այն մարդկանց, որոնք պաշտոնյա են նշանակվում:
Դառնալով Սմբատ Գոգյանին՝ պարոն Խաչատրյանը հավաստիացրեց. «Սմբատի նման մեդալակիրներից շատերն այսօր Հայաստանում չեն ապրում: Համաշխարհային օլիմպիադաների մեդալ նվաճածների մոտ 80 տոկոսը ՀՀ-ից գնացել է, քանի որ նման երեխաների համար կան արտոնություններ. կարող են ընդունվել ցանկացած համալսարան: Նրանք այսօր աշխարհի հայտնի համալսարաններում հայտնի պրոֆեսորներ են: Իսկ Սմբատը մնաց Հայաստանում, աշխատել է մի շարք դպրոցներում, այդ թվում՝ Ֆիզմաթում և Քվանտում, նա ստեղծել է մաթեմատիկայի դասավանդման նոր մոդելներ, ունի իր դպրոցն այդ մոդելի վրա հիմնված: Հայաստանի մաթեմատիկայի օլիմպիական թիմն է ղեկավարում: Սմբատը մեծ ներդրում ունի այդ թիմի հաջողություններում, նա կարողանում է երեխաներին պատրաստել»:
Սերոբ Խաչատրյանն ասաց, թե չի կարող կանխատեսել՝ ԲՈՀ-ի ինչպիսի նախագահ կլինի նա, հորդորեց սպասել, բայց վստահեցրեց. «Շատ սկզբունքային մարդ է: Վստահ եմ ավելի շուտ աշխատանքից ազատվելու դիմում կգրի, քան կոռուպցիոն գործարքների մեջ կներքաշվի: Ճնշումների դեպքում կնախընտրի հրաժարական տալ»:
Անդրադառնալով ԲՈՀ-ի նախկին նախագահ Լիլիթ Արզումանյանին՝ աշխատանքից ազատելու փաստին՝ Սերոբ Խաչատրյանը կարևորեց թափանցիկությունը. «Շատ կուզեի, որ կադրային հարցերում էլ կառավարությունը լինի թափանցիկ և բացատրվի, որ այս մարդը մնում է այս պաշտոնում, որ այս մարդը՝ ոչ: Օրինակ՝ պետք է բացատրություն լինի՝ ինչո՞ւ որոշվեց Լիլիթ Արզումանյանին աշխատանքից ազատել, իսկ Գիտության պետական կոմիտեի նախագահին պահել: Բոլորս էլ գիտենք, որ երկու կառույցներից էլ դժգոհություններ կային: Մյուս կողմից էլ համաձայն չեմ, որ բոլորին հանում են: Կան բաներ, որոնց այդ մարդիկ տիրապետում են, և միանգամից բոլորին հանելը կարող է անջրպետ ստեղծել»:
Տաթև ՀԱՐՈՒԹՅՈՒՆՅԱՆ
