Հայաստանը պաշտոնական հրավեր է ստացել՝ մասնակցելու Թուրինում անցկացվող «Ոսկե բոքյուզ» միջազգային ամենահայտնի խոհարարական մրցույթին, հաղորդում է Euromag-ը:
Օրերս Թուրինում անցկացվել է մրցույթի եվրոպական ընտրական փուլը, որին մասնակցել է 20 երկիր: Մասնակից երկրներից բացի՝ Թուրին է ժամանել նաև պատվիրակություն Հայաստանից, որի մեջ են շեֆ-խոհարարներ Ռաֆայել Քազումյանն ու Կարեն Պողոսյանը, ինչպես նաև Yerevan Food Fest-ի ղեկավար, հասարակական գործիչ Աննա Մազմանյանը:
Հայաստանն Աննա Մազմանյանի նախաձեռնությամբ մրցույթին մասնակցելու բանակցությունները սկսել է դեռ մեկուկես տարի առաջ: Այժմ Հայաստանը ստացել է կազմակերպչական կոմիտեի համաձայնությունը՝ հայտ ներկայացնել՝ մասնակցելու 2020թ. եվրոպական ընտրական փուլին:
«Առաջին անգամ երկրի մասնակցության մասին մտածել եմ տարիներ առաջ: Մենք երկար բանակցություններ ենք վարել և այս անգամ ժամանել ենք GL Event ընկերության ղեկավար Ֆլորան Սուպլիսոնի պաշտոնական հրավերով: Այժմ մենք մասնակցության հրավեր ենք ստացել: Սա շատ երկարատև գործընթաց է. անհրաժեշտ է ներգրավել խոհարարների և այլ մասնագետների: Սակայն մենք համոզված ենք, որ նման մակարդակի մրցույթներին մասնակցությունը մեծ խթան է տալիս ճյուղի զարգացմանը և բարձրացնում է երկրի գրավչությունը»,- ասել է Աննա Մազմանյանը:
Պատրաստեց Վիկտորյա ԱՆԴՐԵԱՍՅԱՆԸ
