Այսօր հրաժարականի դիմումներ ներկայացրեցին Լոռու 2 փոխմարզպետ՝ ՀՀԿ-ականններ Տիգրան Բադոյանն ու Արսեն Դարբինյանը: Փոխմարզպետի պաշտոնում իր աշխատանքը շարունակում է ՀՅԴ-ական Հովհաննես Թադեւոսյանը:
Մի քանի օր է, ինչ շրջանառվում էին փոխմարզպետների հրաժարականի մասին լուրերը, դրանց զուգահեռ՝ նաեւ նոր փոխմարզպետի անունը:
Սոցցանցերում կրկին սկսեցին շնորհավորել «Քաղաքացիական պայմանագիր» կուսակցության Վանաձորի տարածքային խորհրդի նախագահ Արամ Խաչատրյանին, այս անգամ փոխմարզպետի պաշտոնում նշանակվելու կապակցությամբ. «Դա իրականությանը չի համապատասխանում: Դա հերթական անգամ այսպես ասած լրագրողական հնարք է, կամ անձնական կարծիքներ, որ գրվում է սոցցանցերում: Ինձ հետ քննարկում կամ խոսակցություն չի եղել»:
Մեզ հետ զրույցում Խաչատրյանն ասաց, որ ինքն այժմ զբաղված է կուսակցական գործունեությամբ: Իսկ թե առաջիկայում ինչ կլինի, ժամանակը ցույց կտա:
Հիշեցնենք, որ Արամ Խաչատրյանի անունը շրջանառվում էր նաեւ Լոռու մարզպետի պաշտոնի համար:
Տաթեւիկ ՂԱԶԱՐՅԱՆ
