«Դա եղել է տիկին Թանդիլյանի անձնական դիրքորոշումը»,- խորհրդարանում լրագրողների հետ զրույցում ասաց «Ելք» խմբակցության պատգամավոր Էդմոն Մարուքյանը`պատասխանելով իր կուսակից Մանե Թանդիլյանի`պաշտոնը լքելու մասին հայտարարությանը: Մանե Թանդիլյանի քայլը անակնկալ է եղել իր կուսակիցների համար էլ:
Ի դեպ, Էդմոն Մարուքյանը ասուլիս էր հրավիրել խմբակցության ղեկավարի սենյակում: «Ելք» խմբակցությունը դեռեւս ղեկավար չունի: «Լուսավոր Հայաստանը» այդ պաշտոնում տեսնում է Էդմոն Մարուքյանին, «Քաղաքացիական պայմանագիրը»`Լենա Նազարյանին:
Էդմոն Մարուքյանը հարգանքով է վերաբերվում իր ընկերոջ որոշմանը: Ասում է`իր համար էական նշանակություն ունեին պարտադիր կուտակային համակարգի ներդրման հետ կապված հարցերը: Վարչապետը դեռ չի ընդունել Մանե Թանդիլյանի հրաժարականի դիմումը: Էդմոն Մարուքյանն ուրախ կլինի, եթե տարբերակներ գտնվեն եւ Մանե Թանդիլյանը շարունակի պաշտոնավարել: Այս պահին «Լուսավոր Հայաստանում» աշխատանքի եւ սոցիալական ապահովության հարցերի նախարարի այլ թեկնածության հարց չի քննարկվում:
Կուսակցությունից դուրս գալու հարցը Էդմոն Մարուքյանը նույնպես Մանե Թանդիլյանի անձնական դաշտում է դիտարկում, բայց ասում է, որ խնդիր չի լինի եւ «Լուսավոր Հայաստանում» իր ներկայությամբ Մանե Թանդիլյանը չի խանգարի կուսակցության եւ կառավարության համատեղ աշխատանքին: Մանե Թանդիլյանի հեռանալը կուսակցությունից ինչպե՞ս կազդի «Լուսավոր Հայաստանի» ռեյտինգի վրա, Էդմոն Մարուքյանը չգիտի, սոցիոլոգիական հարցումներ չի անցկացրել:
Այլ մանրամասները`տեսանյութերում
Նելլի ԳՐԻԳՈՐՅԱՆ
