Լոռու մարզի երեք փոխմարզպետներից Տիգրան Բադոյանը մի քանի րոպե առաջ հրաժարականի դիմում ներկայացրեց: Aravot.am-ի հետ զրույցում Բադոյանն ասաց, որ իր հրաժարականը պայմանավորված է երկրում ստեղծված իրավիճակով: Այդ իսկ պատճառով էլ նպատակահարմար է գտել դուրս գալ այդ պաշտոնից. «Այստեղ նոր մարզպետի անձի կամ նրա հետ աշխատելու հետ կապված հարց չէ: Սա նոր իրավիճակ է, նոր կառավարություն է, ես թիմային մարդ եմ, թիմային աշխատող եմ, եւ այս պահին նպատակահարմար գտա, որ այսպես ավելի ճիշտ է: Հաջողություն եմ մաղթում մեր ազգաբնակչությանն ու նոր թիմին: Ապրենք, տեսնենք նորություններ ու փոփոխություններ, ինչ կլինի: Սա որպես լոռեցի, որպես քաղաքացի իմ ցանկությունն է»:
Բադոյանն ասում է, որ առաջիկայում կզբաղվի գիտամանկավարժական գործունեությամբ: Նա մարզպետի տեղակալի պաշտոնը զբաղեցնում էր 2012 թվականից:
Փոխմարզպետի պաշտոնում այժմ շարունակում է պաշտոնավարել ՀՅԴ-ական Հովհաննես Թադեւոսյանը:
Տաթեւիկ ՂԱԶԱՐՅԱՆ
Լուսանկարը՝ Տիգրան Բադոյանի ֆեյսբուքյան էջից
