Վերջերս Կոմիտասի թանգարան-ինստիտուտում կայացավ երեկո՝ նվիրված երաժշտագետ, Երեւանի Կոմիտասի անվան պետական կոնսերվատորիայի պրոֆեսոր Սուսաննա Աճեմյանի հիշատակին: Իրենց մասնակցությունն էին բերել նաեւ պրոֆեսորի ամուսնու՝ կոմպոզիտոր Վարդան Աճեմյանի դասարանի ուսանողները: Առաջին անգամ հնչեց ու միանգամից հանդիսատեսին գրավեց Սեւան Ղարիբյանի «Դայք եւ պայիկք» («Փերիներ») դաշնամուրային վեց պատկերները եւ բարիտոնի ու դաշնամուրի համար գրված «Ցոլք» ստեղծագործությունը: Երկու դեպքում էլ ռոյալի մոտ էր հեղինակը: «Առավոտը» Սեւան Ղարիբյանին ներկայացրել է տարեսկզբին (19.01.2018): Հիշեցնենք, որ նա ուսանում է նաեւ օպերային սիմֆոնիկ դիրիժորություն, դոցենտ Ռուբեն Ասատրյանի ղեկավարությամբ: Հարցին՝ ե՞րբ կլսենք նրա այլ երկերը նույնպես, մեր զրուցակիցը պատասխանեց. «Ձայնագրել եմ եւ տեղադրել YouTube-ում «Պիես լարային քառյակի համար», սոպրանոյի եւ դաշնամուրի համար «Լուսընկա գիշեր», դաշնամուրի համար «Առեղծված» եւ ջութակի ու դաշնամուրի համար գրված «Ֆանտազիա» ստեղծագործություններս»: Ժպիտով էլ հավելեց. «Կարծում եմ՝ շտապել հարկավոր չէ, Երեւանում ուսումնառությանս շրջանում վարպետության դասընթացների եմ հաճախել ջութակահարներ, Շվեյցարիայից Սերգեյ Օստրովսկու, ԱՄՆ-ից Անի Կավաֆյանի, Բելգիայից կոմպոզիտոր Կլոդ Լեդուի մոտ, ներկա եմ գտնվել ճապոնացի ջութակահար Ակիկո Սուվանայի, կանադաբնակ կոմպոզիտորներ Վահրամ Սարգսյանի, Ժան Սարգսյանի դասընթացներին եւ այլն: Դիրիժորության գծով ուսումնասիրել եւ ղեկավարել եմ առայժմ ռոյալի ընկերակցությամբ Չայկովսկու առաջին, Հայդնի Լոնդոնյան, Պրոկոֆեւի Դասական եւ Շուբերտի Անավարտ սիմֆոնիաները»: Նշենք, որ երաժիշտը ծնվել է Երեւանում, տասը տարեկանից ընտանիքով տեղափոխվել են Լիբանան, ուսանել է Համազգայինի «Բարսեղ Կանաչյան» քոլեջի ջութակի դասարանում, հետո՝ Բախի անվան երաժշտական ինստիտուտում:
Սեւան Ղարիբյանն ու բարիտոն Գոռ Սալնազարյանը ելույթի պահին:
Զրույցին ներկա էր երիտասարդի հայրը՝ լորինկոլոգ Ավետիս Ղարիբյանը, որը, ըստ մեր տեղեկությունների՝ բժշկական օգնություն է ցուցաբերել վարչապետ Նիկոլ Փաշինյանին: Նա ընդամենը հաստատեց ասվածը, նշեց, որ դա վաղուց էր, իսկ թավշյա հեղափոխությունից հետո վարչապետը բուժում է ստանում մեր հայրենակից, ճանաչված ֆրանսահայ Գեւորգ Աբգարյանի մոտ, շեշտելով, որ վարչապետը իսկապես վստահելի ձեռքերում է:
Հարցին՝ ինչպես եղավ իր ընտանիքի հայրենադարձությունը, մեր զրուցակիցը ներկայացրեց հետեւյալը. «1990թ. Լիբանանից եկա Հայաստան, ուսանեցի Հերացու անվան պետական բժշկական համալսարանում: Այդ ընթացքում ծանոթացա ապագա կնոջս՝ մասնագիտությամբ բանասեր Նարինեին, լույս աշխարհ եկան մեր երկու որդիները եւ հետո արդեն ընտանիքով վերադարձա ծննդավայրս: Այդ ընթացքում վերապատրաստման նպատակով մեկնել եմ Փարիզ, իսկ ընտանիքով վերջնական Հայաստան եկանք 2002թ.: Նպատակս էր գիտելիքներս գործածել հայրենիքում: Այստեղ առաջին տարիներին դա ստացվում էր, վկան՝ հիվանդներիս շնորհակալական խոսքերն էին: Հիմա շուրջ տասը տարի է՝ ինչ չեմ աշխատում: Իհարկե, դա իր պատճառներն ունի, որոնց մասին չեմ բարձրաձայնի… Բայց մի բան կասեմ. պատրաստ եմ քիթ-կոկորդ-ականջաբանի մասնագիտական հմտություններս անվճար ծառայեցնել դրա կարիքն ունեցողներին»:
Ասում են՝ Երեւանի օպերային թատրոնում մինչեւ 1980-ականները աշխատել է լորինկոլոգ Արմեն Վարդանյանը, որն առաջին մասնագիտությամբ ջութակահար էր: Հավաստիացնում են, թե Խորհրդային Միության օպերային թատրոններից, այդ թվում՝ Մոսկվայի Մեծ թատրոնից, Երեւան՝ Արմեն Յակովլեւիչի օգնությանն էին դիմում անվանի շատ երգիչներ: Փաստորեն շուրջ 40 տարի է՝ ինչ մեր թատրոնում այդ աշխատատեղը թափուր է: Այս առիթով մեր զրուցակից Ավետիս Ղարիբյանն ասաց, որ անկասկած, պատրաստակամ է հարկ եղած դեպքում օգնել մեր արվեստագետներին:
ՍԱՄՎԵԼ ԴԱՆԻԵԼՅԱՆ
Գլխավոր լուսանկարում` Հայր եւ որդի Ղարիբյանները:
«Առավոտ»
12.06.2018
