Ինչպես հայտել ենք, այսօր ԱԺ հայտարարությունների ժամին ԱԺ փոխխոսնակ Միքայել Մելքումյանը անդրադարձավ կառավարության նախաձեռնությամբ շրջանառության մեջ դրած «Բարեգործության մասին» օրենքի նախագծին եւ նա «Ծառուկյան» դաշինքից միակը չէր, որ բողոքեց:
Նույն խմբակցության պատգամավոր Իվետա Տոնոյանն էլ ասաց, որ բոլորի համար տարօրինակ էր այդ չարաբաստիկ նախագիծը. «Ընդհանրապես համաշխարհային պրակտիկայում որեւէ նման բան գոյություն չունի»:
Տոնոյանն ասաց, որ արտահերթի ժամանակ է նախագիծը քննարկվելու, բայց հույս ունի, որ իրենց ելույթները սթափության կոչ կլինեն գործող կառավարության համար եւ կվերանայվի օրենքի նախագիծն օրակարգ բերելու հարցը:
Տոնոյանը նկատեց, որ օրենքի նախագիծը մշակել է նախորդ կառավարությունը՝ Կարեն Կարապետյանի գլխավորությամբ եւ, ըստ նրա, դա Կարապետյանի քայլերի շարունակությունն էր, սկզբում «Մուլտի գրուպ» ընկերությունում հարկային տեռոր է արել, չհիմնավորված ստուգումներ, մարդու իրավունքների ոտնահարում, եւ առավել քան հստակ է, որ իբր թե բարեգործության ոլորտը կանոնակարգելու անվան տակ Ծառուկյանին են ուզել թիրախավորել. «Կարեն Կարապետյանը թերեւս հրաժեշտից առաջ որոշել է, որ վատություն է անում Գագիկ Ծառուկյանին»:
Ըստ Իվետա Տոնոյանի, Կարեն Կարապետյանը անձնական վրեժխնդրությամբ բարեգործ Գագիկ Ծառուկյանի բարեգործական ընկերությունների համար արգելքներ է փորձել սահմանել. «Գագիկ Ծառուկյան բարեգործական հիմնադրամը շուրջ 2 տասնամյակ բարեգործական ծագրեր է իրականացրել»:
Նա ասաց, որ միայն ամեն տարի տասնյակ միլիոնավոր դրամներ են ծախսվում սպորտի ոլորտում, Ծառուկյանը մշտապես բաժին է հանել իր ունեցվածքից դրա կարիքն ունեցողների համար: Պատգամավորը սպառնաց, որ եթե շարունակեն այդ արգելանքները դնել իրենք կհորդորեն Ծառուկյանին վերանայել իր բարեգործական դիրքորոշումը. «Դրանից տուժող բազմաթիվ մարդիկ բառեր կգտնեն այս շիլաշփոթը ստեղծողների եւ իրենց անձնական ամբիցիաները ժողովրդի հաշվին բավարարողներին իրենց արժանի գնահատականը տալու համար: Մեր ժողովրդական բանահյուսությունը շատ պերճախոս է այս առումով»:
Հռիփսիմե ՋԵԲԵՋՅԱՆ
