«Դատական ակտերի հարկադիր կատարման մասին» օրենքում լրացումներ կատարելու մասին օրենքի նախագիծն է քննարկվում ԱԺ-ում, որով առաջարկվում է բռնագանձման ոչ ենթակա դրամական գումարների հարցում լրացում կատարել: Նախագիծը ներկայացրեց ՊՆ փոխնախարար Մակար Ղամբարյանը: Նա ասաց, որ առաջարկում են, որ պարտադիր զինծառայություն անցնող շարքային եւ կրտսեր ենթասպայական կազմի զինծառայողներին, ռազմաուսումնական եւ ոստիկանական ուսումնական հաստատությունում սովորող կուրսանտներին եւ սովորողներին տրվող պատվովճարների մասով ապահովի այդ անձանց սոցիալական երաշխիքները:
Ղամբարյանն ասաց, որ «2017-ի դեկտեմբերից ՊՆ համակարգում զինծառայողների գրեթե բոլոր վճարումները անցում կատարվեց անկանխիկի՝ բանկային քարտերի միջոցով եւ դրանից հետո ի հայտ եկան դեպքեր, որ որոշ զինծառայողների մասով, կապված այլ պարտավորությունների չկատարման հետ, դրվեց արգելանքներ գումարների վրա: Ուսումնասիրությունը ցույց տվեց, որ 2 տասնյակ զինծառայողներ են եւ դա վերաբերել է վարկային անուղղակի ստացված պարտականություններին, հանդես են եկել երաշխավորներ: «Ես եմ» ծրագիրն էր սկսվել այդ ժամանակ, որի շրջանակում ապահովության վճարները եւ պատվովճարները արդեն ռիսկի տակ էին նման արգելանք դրվելու տեսանկյունից եւ ամբողջ ծրագիրը կարող էր վտանգվել»:
«Ծառուկյան» խմբակցության պատգամավոր Սերգեյ Բագրատյանը հետաքրքրվեց՝ բա չե՞ք քննարկել, որ պարտադիր բռնագանձման չենթարկեն նաեւ առաջնագծում ծառայող զինվորի աշխատավարձից. «Զինվորը գտնվում է առաջնագծում, պատկերացրեք, որ ընտանիքը մնում է ոչ մեկի հույսին ու երբ այդ զինվորը արձակուրդին վերադառնա ու տեսնի սոված ընտանիք, չեմ կարծում, որ այդ նույն զինվորը նույն սիրով, համերաշխությամբ ու նպատակայնությամբ հայրենիքին կծառայի, եթե չապահովենք իր ընտանիքի սոցիալական երաշխիքները»:
Փոխնախարարը պատասխանեց, որ պայմանագրային զինծառայողների վրա նախագիծը չի տարածվում՝ անկախ նրանից առաջնագծում են ծառայում, թե ոչ:
Մակար Ղամբարյանն ասաց, որ կարող են քննարկել այդ հարցը:
«Ծառուկյան» խմբակցության պատգամավոր Վահե Էնֆիաջյանն էլ առաջարկեց, որ ԱԻՆ-ի աշխատակիցների համար էլ այդ հնարավորությունը տան, որ նրանց աշխատավարձից էլ չբռնագանձվի, որովհետեւ դա էլ է ծառայություն համարվում: Մակար Ղամբարյանը պատասխանեց, որ «Ես եմ» ծրագրից է եկել հարցի քննարկումը, ԱԻՆ-ի մասով նա խոստացավ լրացուցիչ քննարկել:
Կորյուն Նահապետյանն էլ ասաց, որ հանձնաժողովում քննարկման ժամանակ առաջարկ է եղել, որ ԱԱԾ-ի աշխատակիցներին էլ ընդգրկեն այդ ցանկում:
Հռիփսիմե ՋԵԲԵՋՅԱՆ
