«Կառավարությունում ամեն մեկն իր տեսակետը կարող է հնչեցնել, բայց սա նաեւ քաղաքական եւ կոլեգիալ մարմին է: Կառավարությունը միանձնյա որոշումներով չպետք է առաջ գնա: Բայց եթե կան տարակարծություններ գլխավոր սկզբունքային հարցերի շուրջ, ոչ ոք չի կարող որեւէ մեկին ստիպել` քվեարկի, որովհետեւ մեծամասնությունն այդպես է ուզում: Սա մեզ հին ու բարի ժամանակներն է հիշեցնում»,- խորհրդարանում լրագրողների հետ զրույցում այսօր ասաց ՀՅԴ խմբակցության ղեկավար Արմեն Ռուստամյանն`անդրադառնալով ՀՅԴ-ական նախարար Արծվիկ Մինասյանի եւ վարչապետ Նիկոլ Փաշինյանի`կառավարության նիստում երեկ պարտադիր կուտակային կենսաթոշակային համակարգի հետ կապված բանավեճին:
Արմեն Ռուստամյանն ասում է`իրենք դեմ են պարտադրանքով համաձայնեցման ու միաձայնության:
Նիկոլ Փաշինյանը նաեւ ասել էր` ովքեր այդ պարտականությունները չեն վերցնում, իրենց հետ չեն: Արմեն Ռուստամյանը պատասխանում է. «Ով մեր հետ չէ, մեր դեմ է, սա էլ հիշեցնում է մի քիչ ավելի ստալինյան ժամանակաշրջանը»:
Այլ մանրամասները`տեսանյութում
Արմեն Ռուստամյանը հավաստիացնում է`կոնյուկտուրայից ելնելով չեն պատրաստվում սկզբունքները վերանայել:
ՀՅԴ-ական գործիչը ՀՀ նոր իշխանություններին հիշեցնում է. «Սուպերվարչապետությունից էին խոսում, հիմա հենց հարցերի հարցն այն է, որ վարչապետի լիազորությունները պակասեցնելու ուղղությամբ պետք է հստակ քայլեր կատարվեն: Դեռ այդ քայլերը չեն կատարվում»: Կարծում է, որ համընդհանուր «ադաբրյամսի» մթնոլորտում առաջընթաց չի լինում:
Մանրամասները`տեսանյութում
Նելլի ԳՐԻԳՈՐՅԱՆ
