Երեւանի Ա. Երզնկյանի անվան թիվ 118 ավագ դպրոցում տեղակայված քննական կենտրոնում ՀՀ ԿԳ նախարար Արայիկ Հարությունյանը նկատեց՝ վերահսկողությունը բավարար չէ: Aravot.am-ը հետաքրքրվեց՝ մասնավորապես ո՞րն է խնդիրը, պարոն Հարությունյանը պատասխանեց. «Ուզում էի հասկանալ` որքան մարդ է հսկում, բավարա՞ր է այդ հսկիչների թիվը լսարան վերահսկելու համար: Համապատասխան հանձնարարականներ են տրվել նաև իրավապահ մարմինների համապատասխան ծառայության, և ուժեղ վերահսկողություն են իրականացնում»:
Ինչպես արդեն տեղեկացրել ենք Արայիկ Հարությունյանը հունիսի 12-ին այցելեց Երեւանի Ա. Երզնկյանի անվան թիվ 118 ավագ դպրոցում տեղակայված քննական կենտրոն` մասնակցելու «Հայոց լեզու և հայ գրականություն» առարկայի միասնական քննության մեկնարկին:
Դառնալով քննական շրջանում առաջացած խնդիրներին՝ նախարարը նշեց, որ երկու բողոք են ներկայացրել ֆեյսբուքում. «Մեկը գրել էր Չարենցավանում հսկողության ուժեղացման վերաբերյալ և մեկ հոգի գրել էր, որ թիվ 190 դպրոցում միջադեպ է եղել հսկողության հետ կապված: Խնդրեցի կոնկրետ փաստեր ներկայացնել ժամի, լսարանի վերաբերյալ, այդպես էլ կոնկրետ փաստ չներկայացվեց»:
Նախարարը մտահոգված է՝ այս տարի բուհերի համար ճգնաժամային է, բազմաթիվ թափուր տեղեր կան. «Պետք է փորձենք այս իրավիճակից դուրս գալ, թեպետ այս ընդունելությունը վեց տարի շարունակ դեռ հետապնդելու է բուհերին: Դա ազդելու է դրույքների, ծանրաբեռնվածությունների վրա»:
Մեր հարցին՝ այսինքն՝ բուհերը կրճատումների առա՞ջ են կանգնելու, նախարարը պատասխանեց. «Ես հույս ունեմ, որ գործը դրան չի հասնի»:
Ավագ դպրոցների վերաբերյալ հարցին ի պատասխան նախարարն ասաց, որ բովանդակությունը պետք է փոխվի. «Կրկնուսույցների խնդիրն առաջանում է նրանից, որ ավագ դպրոցն իր դերակատարությունը չունի: Մենք պիտի այնպես անենք, որ այլևս աշակերտը կրկնուսույցի կարիքը չունենա: Ճիշտ են նշում ծնողերը, որ աշակերտների համար երբեմն 12-րդ դասարանում անելիք չի լինում»:
Քննական կենտրոնի ղեկավար Գյուլնարա Փալիկյանը տեղեկացրեց, որ քննությանը մասնակցում է 120 դիմորդ, յոթ բացակա ունեն: Դառնալով վերահսկողության ոչ բավարար լինելու՝ նախարարի դիտարկմանը, տիկին Փալիկյանն ասաց. «Ոչ բավարարի խնդիր չկար, քանի որ այստեղ՝ դռան մոտ են դիտորդները, ուստի թողել են՝ երեխան մտնի ներս և առաջ անցնի: Մեր հսկողներն այստեղ էին, իրենք կտեսնեին հաստատ, ուղղակի այդ պահին է այդպես ստացվել»:
Դիմորդ Արփի Ալավերդյանը մեզ հետ զրույցում հայտնեց, որ ցանկանում է ընդունվել ԵՊՀ ժուռնալիստիկայի ֆակուլտետ. «Սիրում եմ տեղեկատվություն ստանալ և կիսվել դրանով: Ուստի շատ ճիշտ ֆակուլտետ է ինձ համար: Պատրաստվել եմ քննությանը շուրջ մեկ տարի. տեսենք՝ ինչ կլինի»:
Հարցին՝ գո՞հ եք ավագ դպրոցից, Արփին պատասխանեց. «Այդքան էլ բավարար չէին գիտելիքները: Ինչքան էլ դպրոցում սովորես, մեկ է, այդ գիտելիքներով շտեմարան չես կարող լրացնել, մինչև քեզ ուղղություն չտան: Մինչդեռ, եթե ավագ դպրոցն ինքն իր գիտելիքը լիարժեք տար, շատ ավելի հեշտ կլիներ համալսարան ընդունվելը»:
Գարիկ Գրիգորյանն ուզում է ընդունվել Ճարտարապետության և շինարարության պետական համալսարան: Նա ևս դժգոհ է ավագ դպրոցից. «Եթե ուսուցումը տասը տարի լիներ, ավելի լավ կլիներ: Իհարկե, ստացել ենք գիտելիքներ, բայց, այսպես թե այնպես, պետք է պարապել կրկնուսույցի մոտ, քանի որ դպրոցի կես օր ժամանակը չի հերիքում, որ այսքան բան կարողանանք սովորել»:
Տեղեկացնենք՝ քննությունների պատասխանները կհրապարակվեն քննության ավարտից մեկ ժամ հետո, իսկ արդյունքները՝ հինգերորդ օրը:
Տաթև ՀԱՐՈՒԹՅՈՒՆՅԱՆ
