ԱՄՆ ֆինանսների նախարարությունը պատժամիջոցներ է սահմանել Ռուսաստանի 3 քաղաքացիների և 5 ընկերությունների վրա, որոնց գերատեսչությունը կապում է Ռուսաստանի Անվտանգության դաշնային ծառայության հետ:
Ընկերություններից մեկը Պետերբուրգում տեղակայված «Դայվտեխնոսերվիսն» է, որը զբաղվում է ջրասուզակների համար նախատեսված սարքավորումների արտադրությամբ և մատակարարմամբ:
«2007թ.ից «Դայվտեխնոսերվիսը» տարբեր ստորջրյա սարքավորումներ է մատակարարել ռուսական գերատեսչություններին, այդ թվում Անվտանգության դաշնային ծառայությանը: 2011թ.-ից «Դայվտեխնոսերվիսը» պայմանագիր է ստացել Անվտանգության դաշնային ծառայության համար 1.5 մլն դոլար արժողությամբ ստորջրյա սարքի ստեղծման համար»,- ասվում է ԱՄՆ ֆինանսների նախարարության հաղորդագրության մեջ:
Պատժամիջոցների տակ է հայտնվել նաև «Քվանտ» գիտահետազոտական ինստիտուտը, որը պատվերներ է ստացել Անվտանգության դաշնային ծառայությունից, ինչպես նաև Digital Security-ն, որը մասնագիտացած է տեղեկատվական անվտանգության ոլորտում, և ըստ ԱՄՆ գերատեսչության, 2015թ. զբաղվել է ռուսական հատուկ ծառայությունների «հարձակողական կիբերհնարավորությունների ուժեղացմամբ»:
Պատրաստեց՝ Վիկտորյա ԱՆԴՐԵԱՍՅԱՆԸ
