Կառավարությունը նախատեսում է Հարկային օրենսգրքում 80-ից ավելի փոփոխություններ ու լրացումներ կատարել: Այս մասին տեղեկանում ենք կառավարության նիստի այսօրվա օրակարգից: Նախագիծը կառավարություն կներկայացնի ֆինանսների նախարար Ատոմ Ջանջուղազյանը:
Օրենսդրական նախաձեռնությունը վերաբերում է հարկային մարմնի կողմից վերահսկվող եկամուտների գծով արտոնություններ սահմանելուն, նորմատիվ իրավական ակտերի մասին Հայաստանի Հանրապետության օրենքում լրացում կատարելուն: Կառավարության օրենսդրական նախաձեռնությունը սահմանված կարգով կներկայացվի Ազգային ժողով:
Կառավարությունը նախագծի անհարժեշտությունը պայմանավորում է գործարար միջավայրի բարելավմամբ, հարկային վարչարարության արդյունավետության բարձրացմամբ:
Պարոն Ջանջուղազյանի մեկնաբանմամբ, նախագծերի փաթեթով առաջարկվում է ստեղծել հնարավորություն, որպեսզի առեւտրային բանկերը կարողանան առանց լրացուցիչ հարկային պարտավորություններ կրելու ֆիզիկական անձանց ներել մինչեւ 2018 թվականի մայիսի 31-ը անհուսալի ճանաչված վարկերի գծով հաշվարկված տույժերն ու տուգանքները: Առաջարկվում է նաեւ ֆիզիկական անձանց համար իրականացնել եւս մեկ համաներում՝ կապված գույքի (ավտոմեքենա, բնակարան, առանձնատուն, արտադրական, հասարակական կամ այլ առեւտրային տարածք) օտարման գործարքներից առաջացող ԱԱՀ-ի նկատմամբ հաշվարկված տույժերի ու տուգանքների հետ՝ պայմանով, որ օրենքի ընդունումից սկսած՝ 90 օրվա ընթացքում վճարվի հարկի մայր գումարը:
«Անհրաժեշտությունը կայանում է նրանում, որ շատերը չեն հասցրել օգտվել նախկին համաներումից եւ ներկայումս ունեն կուտակված հարկային պարտավորություններ: Մասնավորապես, 2016-2017թթ. նշված արտոնությունների կիրառումից հետո լիազոր մարմինների կողմից տրամադրվել են տեղեկություններ ֆիզիկական անձանց կողմից իրականացված գույքի օտարման գործարքների վերաբերյալ: Եթե այդ տեղեկությունները ՀՀ ԿԱ ՊԵԿ-ին տրամադրվեին արտոնությունների տրամադրման ժամանակահատվածում, ապա նշված ֆիզիկական անձինք, իմանալով իրենց հարկային պարտավորությունների մասին, կարող էին օգտվել արտոնությունից»,-նախագծում մեկնաբանում է ֆինանսների նախարարը: Ըստ նրա, առաջարկվում են նաեւ կարգավորել 2018 թվականի հուլիսի 1-ից հանրային սննդի գործունեությունը արտոնագրային հարկի համակարգից շրջանառության հարկի համակարգ տեղափոխելու հետ կապված խնդիրները, որպեսզի այս ոլորտում գործունեություն իրականացնող տնտեսավարող սուբյեկտները կարողանան սահուն անցում կատարել հարկման նոր համակարգին:
Միաժամանակ, առաջարկվում է վերականգնել հանրային սննդի կազմակերպման
ոլորտում հսկիչ դրամարկղային մեքենաների կիրառության կանոնների խախտման
դեպքերում կիրառվող տարբերակված պատասխանատվության միջոցները՝ հաշվի առնելով այն, որ 2018 թվականի հուլիսի 1-ից հանրային սննդի կազմակերպման գործունեության մասով հարկային պարտավորությունները հաշվարկվելու են իրացման շրջանառության հիման վրա:
Լուսինե ԲՈՒԴԱՂՅԱՆ
