Այսօր կառավարության արտահերթ նիստում ներկայացվելու է «Կուտակային կենսաթոշակների մասին» ՀՀ օրենքում լրացումներ կատարելու մասին» օրենքի նախագիծը: Այս նախագծի համաձայն, պետությունը քաղաքացիների եկամուտների նվազեցման բեռը փորձում է մեղմել:
Հուլիսի 1-ից ուժի մեջ է մտնելու կուտակային կենսաթոշակային համակարգի պարտադիր բաղադրիչը: Ներկայումս պարտադիր կուտակային կենսաթոշակային համակարգի մասնակիցը կուտակում է իր եկամտի 10%-ը. 5 %-ը վճարում է անձը, 5%-ը՝ անձի օգտին պետությունը։ Ըստ կառավարություն ներկայացված որոշման նախագծի, համակարգին անդամակցող, ինչպես նաեւ նոր միացող անձանց համար դա լրացուցիչ բեռ է, որը հանրության հիմնական մտահոգությունն է։ Նախագծով առաջարկվում է այդ 10%-ի ձեւավորման այլ մեխանիզմ՝ 2,5%-ը քաղաքացին, 7,5%-ը՝ պետությունը։
«Օրինակ, 200 000 դրամ աշխատավարձի դեպքում անձը կատարում է 10 000 դրամ սոցիալական վճար, իսկ պետությունն իր հերթին ավելացնում է եւս 10 000 դրամ։ Նախագծի համաձայն, անձը կվճարի 5000 դրամ (2,5 %-ը), իսկ պետությունը՝ 15 000 (7,5%-ը)։ Այս դրույքաչափերը կգործեն մինչեւ եկամտային հարկի բարեփոխումների ուժի մեջ մտնելը, որի արդյունքում կնվազի վճարվող եկամտային հարկը՝ նվազեցնելով նաեւ սոցիալական վճարների բեռը համակարգի մասնակիցների համար»,-գրված է որոշման նախագծում։
Բացի այս, նախագծում ներկայացվում է համակարգի ֆինանսական հատվածը, ըստ այդմ, այս պահի դրությամբ կուտակային ֆոնդերում հավաքված է 120 միլիարդ դրամ, որի 7%-ը ներդրված է Հայաստանի տնտեսության մեջ:
«Այս պրոցեսն անցել է անդառնալիության կետը, եւ տվյալ խնդրի շուրջ որոշում կայացնելիս պետք է հաշվի առնել այն ռիսկերը, որոնք կարճաժամկետ և երկարաժամկետ առումով կարող են աղետալի հետևանքներ ունենալ Հայաստանի տնտեսության համար, ինչպես նաեւ այն դրական արդյունքը, որը կարող ենք ունենալ համակարգի ամբողջական ներդրմամբ»,-գրված է որոշման նախագծում:
Կառավարությունը խոստանում է շարունակել քննարկումները հասարակության լայն շերտերի հետ՝ նրանց մտահոգություններին արձագանքելու եւ համակարգը երկարաժամկետ հեռանկարում ավելի ճկուն եւ ներառական դարձնելու համար։
Նելլի ԲԱԲԱՅԱՆ
