Տարիներ շարունակ քաղաքապետարանը կամ չի իմացել այդ խնդրի մասին, կամ աչք է փակել։ Այսքան ժամանակ թիվ 19 և 16 պոլիկլինկաների տնօրեններն իրականացրել են կոռուպցիոն գործողություններ, չարաշահել պաշտոնեական դիրքը։ Այս մասին այսօր լրագրողների հետ զրույցում հայտարարեց «ԵԼՔ» խմբակցության ավագանու անդամ Դավիթ Խաժակյանը:
Նա նշեց, որ թիվ 16 պոլիկլինիկայում օրինակ գրանցված են եղել իրականում գոյություն չունեցած աշխատողներ. «Նրանց համար գումարներ են դուրս գրվել ու հայտնվել տնօրենների գրպանում։ Բացի այդ, աշխատակիցների արձակուրդների համար նախատեսված գումարները ևս ուղղվել են տնօրենին»:
Դավիթ Խաժակյանի խոսքով, եթե այդ գումարները հավասարապես բաժանվեին աշխատակիցներին, ապա վերջիններիս աշխատավարձը կբարձրանար։ Հիշեցնենք, որ պոլիկլինիկաների աշխատակիցներն ահազանգել էին աշխատավարձերից պահումների մասին։
Լուիզա ՍՈՒՔԻԱՍՅԱՆ
