«Ավրորա» մարդասիրական նախաձեռնության համահիմնադիր եւ մրցանակի ընտրող հանձնաժողովի անդամ Վարդան Գրեգորյանը պատասխանելով «Ավրորայի» առաքելության վերաբերյալ հարցին՝ փախստականների խնդրի համատեքստում, նշեց. «Հարուստ երկրները հրաժարվում են ընդունել մեծ թվով փախստականների: Հորդանանն ու Պակիստանն, օրինակ ավելի շատ փախստականներ են ընդունում, քան եվրոպական որեւէ երկիր, ամենամեծ թվով՝ 660 000, փախստականներ ընդունած երկիրը Գերմանիան է…
Փախստականների առաջ փակում են դռները, ազգայնական պոպուլիզմը մեծ տեղ է գրավում աշխարհում …Ներգաղթյալները դիտվում են որպես պոտենցիալ թշնամիներ, հանցագործներ եւ խաղաղություն խախտողներ…Չնայած սրան, այսօր ցեղասպանության ճանաչումն արդեն դարձել է ավելի դյուրին, եթե փոխհատուցման հարց չկա»:
ԱՄՆ-ի դիրքորոշման վերաբերյալ մեկ այլ հարցի էլ պատասխանելով, Վարդան Գրեգորյանն ասաց, որ ԱՄՆ նախագահները խուսափում են օգտագործել Ցեղասպանություն բառը, այն փոխարինում են հայերեն եղեռն բառով, կամ արտաբերում են Հոլոքոստ բառը: «Մենք իրենց խնդիրը դարձրել ենք մեր խնդիրը, իրականում իրենք ճանաչել են, սակայն փորձում են բառերի հետ խաղալով պաշտպանվել իրավական վարագույրով»:
Պատասխանելով այն հարցին, արդյոք մտավախություն չունի, որ իրեն կրկին կարող են ձերբակալել, քանի որ մասնակցել է Ցեղասպանության վերաբերյալ «Ավրորա» միջոցառմանը, «Ավրորայի» 2018 թ. դափնեկիր Չո Լա Աունն ասաց, որ անշուշտ ունի նման մտավախություն, սակայն միաժամանակ հավելեց. «Ես կփորձեմ մեր կառավարությանը բացատրել, թե ինչ էի անում «Ավրորայում»:
Գոհար ՀԱԿՈԲՅԱՆ
