Այսօր Իջեւանի լողի մասնագիտացված ՄՊՄԴ-ի անդրանիկ բաց առաջնությանը ներկա եղան նաեւ Տավուշի մարզպետը, Իջեւանի քաղաքապետ Վարդան Ղալումյանը:
Aravot.am-ը զրուցեց քաղաքապետի հետ:
-Որքա՞ն եք կարեւորում Իջեւանում նման մարզահամալիրի գոյությունը:
– Մենք շատ ենք կարեւորում լողի մուտքը մեր քաղաք, ինչը հնարավոր դարձավ ՀԱՕԿ նախագահ Գագիկ Ծառուկյանի եւ Լողի հայկական դաշնության նախագահ Հովսեփ Մեսրոպյանի անմիջական ջանքերի շնորհիվ: Շնորհակալ ենք: Այս մարզահամալիրի վերանորոգված բացօթյա խաղադաշտում արմատավորվում են նաեւ վոլեյբոլը, բասկետբոլը, որոնք խթանում են սպորտն ու առողջ ապրելակերպը ինչպես երեխաների, այնպես էլ մեծահասակների շրջանում: Մենք ուշադրություն ենք դարձնում նաեւ մյուս մարզաձեւերին եւ ջանքեր ենք գործադրում դրանց համար էլ բարվոք պայմաններ ստեղծելու ուղղությամբ:
– Վերջին անգամ Իջեւանում ե՞րբ է լողի առաջնություն անցկացվել:
– Դժվարանում եմ մտաբերել: Անհիշելի ժամանակներում:
– Դուք որպես քաղաքապետ ինչ-որ ձեւով աջակցո՞ւմ եք, որպեսզի բնակիչները ընտանիքներով հաճախեն լողավազան:
– Կարծում եմ, աջակցելու անհրաժեշտություն չկա, որովհետեւ իրենց ցանկությունն էր, որպեսզի Իջեւանում լողավազան լիներ: Հաճախում են:
– Անձամբ օգտվո՞ւմ եք այս լողավազանից:
– Երբ ժամանակը ներում է, առավոտյան վաղ ես ավագանու անդամները, իմ ընկերները գալիս ենք:
Աշոտ ՀԱԿՈԲՅԱՆ
