«Սփյուռքն իրավունք չունի Հայաստանից որեւէ բան պահանջել: Սփյուռքը պետք է օգնի Հայաստանին, որը կառավարություն եւ այլ պատկան մարմիններ ունի: Դրամ տալը չէ խնդիրը, այլ նվիրվելը: Յուրաքանչյուրս պետք է անենք հնարավորը, որ Հայաստանն ամենազարգացած երկրներից մեկը լինի»,- Մատենադարանում այսօր Aurora Dialogues երեւանյան քննարկումների ժամանակ այսօր հայտարարեց «Ավրորա» միջազգային մարդասիրական նախաձեռնության համահիմնադիր, Նյու Յորքի «Կարնեգի» կորպորացիայի նախագահ Վարդան Գրեգորյանը: Նա այսպիսի համեմատություն արեց. «Մենք երկու «թոք» ունենք՝ մեծը՝ Հայաստանը եւ փոքրը՝ Սփյուռքը: Եթե մեկին վտանգ է սպառնում, մյուսը պետք է շնչի, մինչեւ վտանգվածը վերականգնվի»:
Խոսելով այն մասին, թե ինչ փոփոխություններ է ակնկալում Հայաստանում, Վարդան Գրեգորյանն ասաց. «Հայաստանը խնդիրներ ունի՝ երկու կողմից շրջափակում, Արցախյան հիմնախնդիր…կարծում եմ՝ կրթությունը եւ ժողովրդի առողջությունը թիվ մեկ առաջնահերթությունը պետք է լինեն: Կարեւոր է, թե առաջիկա հիսուն տարում Հայաստանն ինչպիսի տնտեսություն եւ կրթություն կունենա»:
Վարդան Գրեգորյանը նաեւ ասաց, որ այսօր մի շարք սփյուռքահայեր ցանկանում են հայրենիք վերադառնալ, ներդրումներ անել: «Եթե չեն էլ ուզում, պետք է ստիպենք գալ»,-կատակեց բարերարը:
Լուիզա ՍՈՒՔԻԱՍՅԱՆ
