Սյունիքի մարզից ռեյտինգային ընտրակարգով ընտրված պատգամավոր Մերուժան Սիմոնյանն այսօր մանդատից հրաժարվելու դիմում է ներկայացրել ԱԺ նախագահին:
Խոսակցություններ կան, որ նա նեղացել է սեփական կուսակցական վերադասերից`իրեն Սյունիքի մարզպետի պաշտոնում չառաջադրելու համար:
Փորձեցինք կապվել պարոն Սիմոնյանի հետ: Վերջինիս հեռախոսն անջատված էր: Մեր տեղեկություններով, նա`կուսակիցներից խռոված, անջատել է հեռախոսները եւ մեկնել իր բնակավայր՝ Կապան:
Aravot.am-ն այս առիթով մեկնաբանություններ խնդրեց ԲՀԿ գլխավոր քարտուղար Նաիրա Զոհրաբյանից: Նաիրա Զոհրաբյանը հաստատեց` Մերուժան Սիմոնյանի`մանդատից հրաժարվելու մասին տեղեկությունը:
«Հորդորում եմ մեր լավ ընկերոջը`Մերուժան Սիմոնյանին, որը մեր կուսակցության առանցքային դեմքերից է, հետ վերցնել մանդատից հրաժարվելու դիմումը: Ակնկալում եմ, որ նա այդպես էլ կվարվի»:
Հետաքրքրվեցինք`պատճառը Սյունիքի մարզպետի պաշտոնում նրան չառաջադրե՞լն է: Նաիրա Զոհրաբյանը պատասխանեց. «Վստահաբար կարող եմ ասել, որ Մերուժան Սիմոնյանը երբեւէ որեւէ պաշտոնի խնդիր չի դրել»:
Ասաց`ներկուսակցական խնդիրներ են, ոչ մամուլի հրապարակումների համար. «Վստահ եմ, որ կլուծենք դրանք»:
Նշենք, որ Մերուժան Սիմոնյանը հայտարարություն է տարածել, որում ասված է.
«Ես՝ Մերուժան Սիմոնյանս, հրաժարվում եմ «Բարգավաճ Հայաստան» կուսակցության անդամակցությունից:
Իմ կողմից՝ Սյունիքի մարզպետի պաշտոնը զբաղեցնելու մասին մամուլում շրջանառված տեղեկությունների արդյունքում կարող է տպավորություն ստեղծվել, որ ես այս քայլն անում եմ այլ մարդկանց կողմից մարզպետ նշանակվելու պատճառով, բայց ո՛չ, ի գիտություն հայտնեմ.
«Բարգավաճ Հայաստան» կուսակցությունը երկար դադարից հետո իշխանության մաս է կազմում, իսկ ես այս լուսավոր օրը հրաժարվում եմ նաև ռեյտինգային կարգով ստացած պատգամավորի իմ պաշտոնից, որը, ի դեպ, առավել բարձր պաշտոն է, քան մարզպետինը:
Ինձ համար երբևէ պաշտոն զբաղեցնելը ինքնանպատակ չի եղել, առաջնային են եղել իմ խիղճն ու սկզբունքները:
Այս պահին քաղաքականությամբ զբաղվելու ցանկություն չունեմ: Որոշումս կայացրել եմ Սյունիքի իմ ընկերների և թիմակիցների հետ քննարկման արդյունքում:
Անկախ այս ամեն ինչից, շարունակելու եմ լինել հայ մարդու կողքին, սյունեցու կողքին:
Շնորհակալ եմ բոլոր նրանց, ովքեր տարիների ընթացքում անշահախնդիր և անդավաճան եղել են իմ կողքին»:
Նելլի ԳՐԻԳՈՐՅԱՆ
