ԱԺ «Ելք» խմբակցության պատգամավորներ Ալեն Սիմոնյանն ու Հայկ Կոնջորյանն այսօր եկան Երեւանի ընդհանուր իրավասության դատարանի Շենգավիթի նստավայր, որտեղ ընթանում է «Սասնա ծռեր»-ի գործով հերթական դատական նիստը եւ ամբաստանյալ Պավել Մանուկյանի որդու՝ այս գործով եւս ամբաստանյալ Արամ Մանուկյանի համար երաշխավորագիր ստորագրեցին:
Ապա պաշտպանական կողմից Արամ Մանուկյանին կալանքից ազատելու միջնորդություն ներկայացվեց՝ հիմքում ունենալով տվյալ երաշխավորագիրը:
Հիշեցնենք, որ Արամ Մանուկյանին կալանքից ազատ արձակելու համար երաշխավորագիր են ստորագրել նաեւ ԱԺ «Ծառուկյան» խմբակցության յոթ պատգամավորներ՝ նշելով, որ ազատության մեջ գտնվելով՝ ամբաստանյալը կդրսեւորի պատշաճ վարքագիծ եւ չի խուսափի դատաքննությունից: Այդ երաշխավորագիրը եւս ներկայացվեց դատարանին:
Ազատ կարձակվի՞ Արամ Մանուկյանը, թե ոչ, պարզ կլինի աշխատանքային օրվա ավարտին, երբ դատարանը հրապարակի որոշումը:
Արամ Մանուկյանը մեղադրվում է ՀՀ ոստիկանության ՊՊԾ գունդը գրաված զինված խմբի կազմում ապօրինի կզենք, ռազմամթերք ձեռք բերելու, իրացնելու, շենքեր-շինություններ զավթելու, պատանդառության, զենք-ռազմամթերք հափշտակելու եւ դիտավորությամբ գույք ոչնչացնելու համար:
Լուիզա ՍՈՒՔԻԱՍՅԱՆ
