Քիչ առաջ դատավոր Արշակ Վարդանյանի որոշմամբ կալանքից ազատ արձակվեց «Սասնա ծռեր» խմբի անդամ, «Հիմնադիր խորհրդարան» ընդդիմադիր շարժման անդամ Արամ Հակոբյանը (լուսանկարում): Նրա հանդեպ որպես խափանման միջոց ընտրվեց գրավը՝ 500 հազար դրամի չափով: Երբ այդ գումարը փոխանցվի դատարանի դեպոզիտի հաշվին, Հակոբյանն ազատ կարձակվի նիստերի դահլիճից:
Հատկանշական է, որ մեղադրող-դատախազները միջնորդության դեմ չէին առարկել՝ միաժամանակ առաջարկելով ազատման դիմաց հենց գրավ կիրառելը:
Հիշեցնենք, որ մինչեւ «Իմ քայլը» ժողովրդական շարժումը նշյալ միջնորդությունը մի քանի անգամ ներկայացվել էր եւ մերժվել:
Վերջերս զինված խմբի անդամներից ազատ են արձակվել եւս երեք հոգի՝ Հովհաննես Վարդանյանը, Տիգրան Սարգսյանը եւ Արեգ Կյուրեղյանը: Ազատության մեջ են նաեւ զինված խմբին օժանդակելու համար մեղադրվող Կարո Եղնուկյանը, Մանվել Աթոյանը եւ Խաչատուր Գիչյանը:
Արամ Հակոբյանն ունի մոտ մեկ տասնյակ հիվանդություններ, այդ թվում՝ գլխուղեղի արյան շրջանառության խանգարում եւ գլխուղեղի «քրոնիկ իշեմիա», «հիպերտենզիա», սրտի իշեմիկ հիվանդություն: Նա մեղադրվում է 2016թ. «Սասնա ծռեր» խմբի կազմում ապօրինի զենք, զինամթերք կրելու, պահելու, փոխադրելու եւ շենք, շինություններ զավթելու համար:
Լուիզա ՍՈՒՔԻԱՍՅԱՆ
