Սևանի դատարանի դիմաց մեկ անձ վիրավորվել է ոտքի շրջանում: Կրակել են տուժողի իրավահաջորդի վրա: Դատարանում այսօր ընթանում էր Հայկ Հակոբյանի՝ Գեղարքունիքի փոխմարզպետ Անդրանիկ Հակոբյանի (լուսանկարում) միակ որդու սպանության գործով դատավարությունը։ Մեղադրյալը Մեխակ Հարությունյանն է՝ Գեղարքունիքի Նորատուս գյուղի գյուղապետ Մուրադ Հարությունյանի եղբորորդին:
Ըստ pastinfo.am-ի՝ «Մինչ դատարանի շենք մտնելը՝ բակում, որտեղ եղել է նաև Սևանի ոստիկանության բաժնի պետը, ոստիկանության այլ ներկայացուցիչներ, և բազմաթիվ անձինք, ամբաստանյալի ազգականները սեռական բնույթի հայհոյանքներ են հնչեցրել տուժողի իրավահաջորդի հասցեին, հրազենը պահել են նրանց ուղղությամբ»: Տուժողը ըստ աղբյուրի՝ Ռաֆիկ Վանոյի Հակոբյանն է, նրան տեղափոխել են Երևանի հիվանդանոցներից մեկը:
ՀՀ ոստիկանությունն այս առնչությամբ տեղեկացնում է. «Հունիսի 8-ին՝ ժամը 11.50-ին, ոստիկանության Սևանի բաժնում ահազանգ է ստացվել, որ Սևանի դատարանի մոտ կրակոցներ են հնչել։ Ահազանգ է ստացվել նաեւ «Սևան» բժշկական կենտրոնից, որ իրենց մոտ հրազենային վնասվածքներով բուժօգնության է տեղափոխվել Գեղարքունիքի մարզի Նորատուս գյուղի 63-ամյա մի բնակիչ։ Դեպքի վայր մեկնած օպերատիվ խումբը պարզել է տղամարդու ուղղությամբ կրակած անձի ինքնությունը։ Ձեռնարկվում են միջոցառումներ նրան հայտնաբերելու ուղղությամբ։ Կատարվում է քննություն»:
