Ամերիկաբնակ հայտնի կոմպոզիտոր Ալեքսեյ Շորի` Հայաստանի հանդեպ ջերմությունը անձնական պատճառներ ունի: «Հայրս Հայաստանում է մեծացել, 12 տարի այստեղ է ապրել: Իմիջիայլոց, մենք անընդհատ որոշում էինք որեւէ առիթով միասին ձեր երկիր գալ, սակայն ոչ մի կերպ չէր ստացվում: Բարեբախտաբար, անցյալ տարի ծնողներիս հետ եկա, ու հեքիաթային ժամանակ անցկացրինք:
Այս անգամ էլ իմ բալետի առիթով եմ Հայաստանում, խոսքը «Բյուրեղապակյա դղյակի» մասին է, որը երկու անգամ ներկայացվել է Մեծ թատրոնում: Շատ գոհ եմ, որ հանրությունը Երեւանում էլ լավ է ընդունել բալետս»,- «Առավոտի» հետ զրույցում ասաց կոմպոզիտորը: Նրանից նաեւ տեղեկացանք, որ օրերս այցելել է Գյումրի եւ Պուշկինո, որտեղ ժամանակին ապրել է հայրը: «Նույնիսկ գտանք տունը, որն արդեն խարխլված էր, նկարվեցինք այն վայրերում, որոնք պատկերված են մեր տանը պահվող մանկական լուսանկարներում: Այդ հուզիչ դրվագը երբեք չեմ մոռանա»,- ասաց Ալեքսեյ Շորը:
Լուսանկարը` ԳՈՀԱՐ ՀԱԿՈԲՅԱՆԻ
«Առավոտ»
07.06.2018
