«Չհասկացա, դուք կարող եք նաեւ չարախնդա՞լ». Փաշինյանի սուր ելույթը՝ Շարմազանովի, Նաղդալյանի քննադատությունների ֆոնին

Վարչապետ Նիկոլ Փաշինյանը խորհրդարանում կառավարության ծրագրի քննարկման ժամանակ այնպիսի եզրափակիչ ելույթ ունեցավ, որ արժանացավ ծափերի:

Փաշինյանը, խոսելով քննադատությունների մասին՝ ասաց. «Ձեր ասածի մեջ ոչ մի սխալ բան չկա, խնդիրը մտածողության հարթության, ձեւի եւ մոդելի մասին է: Շատ է ասվում, որ մեր ծրագրում չկան թվեր: Մեր ծրագրում կան բազմաթիվ թվեր,մ եթե նկատելի չէ, ես կներկայացնեմ:

Ինչպիսին է լինելու ՀՀ բարձրաստիճան պաշտոնյաների շրջանում կոռուպցիայի մակարդակը, ես պաշտոնապես հրապարակում եմ այդ թիվը՝ 0:

Ինչպիսին է լինելու արտոնյալների տոկոսը, պաշտոնապես հրապարակում եմ այդ թիվը՝ 0:

ՀՀ-ում խոշոր բիզնեսը ամսական ինչքան նալոգ պետք է տա ՀՀ վարչապետին, ես պաշտոնապես հայտարարում եմ այդ թիվը՝ 0:

ՀՀ-ում ինչպիսի եւ քանի մենաշնորհներ պետք է գոյություն ունենան, ես պաշտոնապես հայտարարում եմ այդ թիվը՝ 0:

25 տարի շարունակ  ասել ենք՝ այ այս պլպլան թիվը, որ գրել եք, քանի՞ կոպեկի արժեք ունեն, քանի դեռ Հայաստանում կա կոռուպցիա, կան մենաշնորհներ, կան արտոնյալներ: Այ, գնացեք, կառավարություն, եթե իրոք ազնիվ եք, ուժեղ եք, գնացեք արտոնյալներին վերացրեք, կոռուպցիան վերացրեք, նալոգների համակարգը վերացրեք: Եկել ենք, ասում ենք՝ վերացրել ենք, ասում եք՝ ո՞նց թիվ չեք գրել: Ի՞նչ ա ձեր ուզածը, ժողովուրդ ջան»:

Ըստ Փաշինյանի, կառավարության ծրագրի մասին ամենաճիշտ բնութագիրը տվել է Էդուարդ Շարմազանովը. «Ասում է՝ սա երազանքների ծրագիր է: Այո, պարոն Շարմազանով, ձեր կուսակցությունն ու ձեր կառավարությունը թվերի տակ տրորում էր մարդկանց երազանքը: Սա երազանքների ծրագիր է, սա երազանքների երկիր ունենալու ծրագիր է ու մենք այս ծրագրով ասում ենք, որ ՀՀ քաղաքացիներին վերադարձրել ենք երազելու իրավունքը: Սա մեր կառավարության գործունեության ամենակարեւոր կողմն է:

Երջանկության մասին են խոսում, պետության ֆունկցիայի մասին են խոսում: Դե ցույց տվեք, թե ե՞րբ է այս ամբիոնից հնչել, թե լավ, մեր պետության գոյության իմաստը ո՞րն է: ինքնանպատա՞կ է, ես չեմ հասկանում: Մեր նորանկախ պետության գոյության ընթացքում չի եղել խոսակցություն՝ ինչի՞ համար ենք ստեղծել, որ ամեն մեկս մի պաշտո՞ն ունենանք, մի բիզնե՞ս ունենաք, ծառայողական ավտոնե՞ր, առանձնատնե՞ր, է՞դ ա մեր պետության նպատակը: Կարեւոր է հասկանալ՝ որն է մեր պետության գոյության նպատակը: Երջանկությունը էնքան տարօրինակ բան է թվում, հասկանալի է, խոսում ենք մի խորհրդարանում, որտեղ մարդիկ չեն հասկանում՝ իրենց գործառույթն է մարդկանց երջանկություն տալը»:

Փաշինյանը վստահեցրեց, որ իրենց կառավարության գործունեության ընթացքում մարդիկ ժպտալու են, ժպիտից չեն զրկվելու:

Վարչապետը հայտարարեց. «Էն պահին, երբ մենք չունենանք ժողովրդի վստահությունը, 5 րոպե էլ չի տեւի մեր մնալը կառավարությունում: Էն պահին, որ ես անձամբ զգամ, որ չունեմ ժողովրդի վստահությունը, 5 րոպե ավել չեմ մնա վարչապետի պաշտոնում: Մենք բոլորս հասկանում ենք, որ ԱԺ-ն ինձ վարչապետ ընտրել է՝ ի հեճուկս սեփական ցանկությունների ու թող որեւէ մեկը ինձ չասի, թե ինձ լավություն է արել՝ ՀՀ վարչապետ ընտրելով: Որեւէ մեկը թող չմտածի, որ ինձ կամ կառավարությանը լավություն է անելու՝ կառավարության ծրագրին կողմ քվեարկելով: Մենք որեւէ մեկի լավության կարիքը ԱԺ-ում չունենք, ուզում եք կողմ քվեարկեք, ուզում եք՝ դեմ: Մենք ունենք ժողովրդի վստահությունը եւ այդ վստահությունը պետք է դառնա կոնկրետ քաղաքական արդյունք եւ դա կդառնա կոնկրետ քաղաքական արդյունք՝ անկախ նրանից՝ դուք դա ուզում եք, թե ոչ»:

Փաշինյանն անդրադարձավ Հերմինե Նաղդալյանի քննադատությանը, թե անփորձ են, իսկ ՀՀԿ-ն լուրջ փորձ ուներ, երկիր ղեկավարելը հեշտ չէ. «Տիկին Նաղդալյան, ասում եք՝ լուրջ փորձ ունեք, թույլ տվեք պետության կառավարման ձեր փորձը մենք չկիրառենք, որովհետեւ տեսանք, թե պետության կառավարման ձեր փորձն ուր է տանում եւ ինչի է հասցնում: Ես, օրինակ, հրաժարվում եմ ի սկզբանե պետության կառավարման ձեր փորձից…Հիմա էլ ասում եք՝ ծա՞նր է իշխանության գլխարկը: Ո՛չ, ծանր չի, որովհետեւ եթե ձեզ թվում է, որ մեր իշխանության շուրջ մթնոլորտը ՀՀ-ում այնքան գաղջ է, ինչքան այս դահլիճում, դուք չարաչար սխալվում եք: Շատ հաճելի է էդ իշխանության գլխարկը, որովհետեւ մենք զգում ենք մեր ժողովրդի աջակցությունն ու վստահությունը: Ծանր չի, դա մեծ պատիվ է՝ լինել ժողովրդի իշխանության կրողը ու թող որեւէ մեկը չկասկածի, որ մենք այդ պատիվը չենք արժեզրկի: Ես չհասկացա, էս դահլիճում նայում են մեր կողմը ու ասում են՝ մենք չենք ուզում չարախնդալ: Չհասկացա, դուք կարող եք նաեւ չարախնդա՞լ: Էս ո՞վ ա չարախնդալուց խոսում, էդ ո՞ւմ վրա եք չարախնդալուց խոսում: Ժողովուրդ ջան, եկեք մի քիչ լրջանանք»:

Փաշինյանը հեգնեց նաեւ, որ Նաղդալյանը խոսում է այն մասին,թե տուրիզմի զարգացումը հեղափոխությամբ չի լինում, հյուրանոցներով է լինում, ենթակառուցվածքներով: Նա ասաց, որ հիմա Ֆրանկոֆոնիայի գագաթաժողով են կազմակերպում, բայց պարզվում է՝ իշխանությունները այսքան տարվա ընթացքում չեն կարողացել նորմալ հյուրանոցների հարց էլ լուծել, որ կարողանան հյուրերին տեղավորեն:

Հետո վարչապետը նախկին վարչապետի այն քայլին անդրադարձավ, որ բյուջեից միլիոններ էր ուզում ծախսել, ինչ է Հայաստանը CNN-ով 6 վայրկյան ցույց տան. «Մի ամիս աշխարհի ամբողջ ԶԼՄ-ները մեզ խնդրել են, որ մեզ ցույց տան, հիմա ասում եք՝ տուրիզմը հեղափոխությունով չեն զարգացնում, տեսել ենք ոնց եք զարգացրել տուրիզմը»:

Փաշինյանը վստահեցրեց, որ Հայաստանի խոշոր եւ մանր եղջերավոր անասունների կյանքում բան է փոխվել, նրանք կարող են արտահանվել՝ առանց վարչապետի եղբոր դաբռոյի, ահա թե ինչ է փոխվել, որը ոմանք դժվարանում են հասկանալ:

Ելույթի վերջում Փաշինյանը վստահեցրեց. «Էս կառավարությունը չի՛ տապալվելու, ժողովուրդը չի՛ տապալվելու, հեղափոխությունը չի՛ տապալվելու: ՀՀ-ն լինելու է իրոք ազատ, ժողովրդավարական, իրոք օրենքի իշխանություն ունեցող երկիր»:

Հռիփսիմե ՋԵԲԵՋՅԱՆ