ՀՀԿ պատգամավոր Հերմինե Նաղդալյանը կառավարության ծրագրի քննարկման ժամանակ սկսեց քննադատել վարչապետ Նիկոլ Փաշինյանին ու նրա կառավարությանը: Նա ասաց, որ քաղաքագիտական տարրական պահանջն էլ չեն կատարել ու կառավարություն կազմող ուժերի՝ «Ծառուկյան» դաշինքի, ՀՅԴ-ի, «Ելքի» նախընտրական ծրագրերից էլ չեն ընդգրկել ծրագրում, որ գոնե պատկերացում կազմեին, թե ով, որ քաղաքական ուժն է սրա պատասխանատուն:
Ըստ նրա, սա ոչ թե կառավարության ծրագիր է, այլ՝ ուղերձ միայն, ոչ մի կոնկրետ քայլ, հիմնադրույթ, հայեցակարգ, ուղի, ձեւ, գործիք, թիվ, չափ նշված չէ. «Արդեն այդ փաստը ստիպում է մտածել, որ ծրագրի հեղինակները դեռեւս հեռու են այն պատկերացումից, թե ինչպես են երկիր կառավարում: Ցավոք, ձեր կառավարությունն անփորձ է: Սակայն ՀՀ նախորդ կառավարությունները ունեն կուտակած փորձ, պետք չէ հեղափոխականորեն ամեն ինչ մերժել ու գրողի ծոցն ուղարկել: Պետություն կառավարելը լուրջ գործ է, որ սիրուց, համերաշխությունից ու նվիրումից բացի կառավարության անդամներից պահանջում է գիտելիք, իմացություն, երկրի տնտեսության իմացություն, զարգացման հեռանկարների պատկերացում: Այս ծրագիրը ՀՀ տնտեսական ներուժի մասին պատկերացում չի տալիս, նույնիսկ չի գույքագրվել, թե ինչ կա, ինչ չկա: Այս ծրագրով Հայաստանի Հանրապետությունը հեռու չի գնա: Գլխավոր գործիքը պոպուլիզմն է, ավաղ պոպուլիզմը չի դառնում աշխատատեղ, չի դառնում կենսաթոշակի ու նպաստի բարձրացման հնարավորություն»:
Նաղդալյանը նաեւ ասաց, թե աղքատիկ պատկերացում ունեն առաջնահերթությունների մասին, որեւէ ռեալ առարկայական հայեցակարգային քայլ չի մատնանշվել. «Հեղափոխությունը, նույնիսկ հայկականը՝ թավշեն, տեսարժան վայր չէ, որ զբոսաշրջիկ բերի Հայաստան: Զբոսաշրջության զարգացման համար այլ բան է պետք՝ էժան հյուրանոցներ, ենթակառուցվածքներ, բայց ոչ հեղափոխության էյֆորիան»:
Հետո Նաղդալյանն ասաց, որ որեւէ կառավարություն, անգամ ամենաանցումային ու ամենաժամանակավոր, չպետք է իրեն նման կիսատ-պռատություն թույլ տա, ինչ գրված է՝ կցկտուր ընդհանուր դատողություններ են՝ սիրողական մակարդակում:
Դիմելով Փաշինյանին՝ նա ասաց. «Թույլ տվեք հարցնել՝ ծա՞նր է իշխանության գլխարկը, քննադատելը ավելի հեշտ էր»:
Հռիփսիմե ՋԵԲԵՋՅԱՆ
