ԱՄՆ նախագահ Դոնալդ Թրամփը համաներում է շնորհել 63-ամյա Էլիս Ջոնսոնին, որը ցմահ ազատազրկման էր դատապարտվել թմրանյութերի տեղափոխման համար: Նման խնդրանքով Թրամփին դիմել էր ամերիկյան ռեալիթի-շոուի աստղ Քիմ Քարդաշյանը:
Հիշեցնենք, որ Թրամփի և Քարդաշյանի հանդիպումը կայացել էր մայիսի 30-ին Սպիտակ տանը: ԱՄՆ նախագահը Twitter-ում գրել էր, որ Քարդաշյանի հետ քննարկել է բանտային բարեփոխումներն ու դատավճիռների կայացումը:
Քարդաշյանը գրառում է կատարել Twitter-ի իր միկրոբլոգում՝ շնորհակալություն հայտնելով ԱՄՆ նախագահ Դոնալդ Թրամփին, վերջինիս փեսա Ջարեդ Քուշներին՝ նման որոշում կայացնելու համար: «Նրա (Էլիս Ջոնսոնի-խմբ.) պատժի մեղմացումը ոգեշնչող և հույս է տալիս շատերին, ովքեր արժանի են երկրորդ հնարավորության»,-գրել է Քարդաշյանը:
63-ամյա աֆրոամերիկուհու գործը մեծ հնչեղություն ստացավ 2017թ. հոկտեմբերին այն բանից հետո, երբ Mic նախագիծը հոլովակ հրապարակեց կնոջ ճակատագրի մասին:
Դատարանի վճռի համաձայն՝ Ջոնսոնը 1991-1994թթ. զբաղվել է թմրաբիզնեսով: Նախկինում կինը քրեական պատասխանատվության չի ենթարկվել, նրա կողմից կատարած հանցագործությունը բռնություն չի պարունակել, բայց Ջոնսոնը դատապարտվել է ցմահ ազատազրկման՝ առանց վաղաժամկետ ազատ արձակվելու իրավունքի:
Պատրաստեց Վիկտորյա ԱՆԴՐԵԱՍՅԱՆԸ
