Դատավոր Արտուշ Գաբրիելյանի որոշմամբ քիչ առաջ կալանքից ազատ արձակվեց «Սասնա ծռեր» խմբի անդամներից Տիգրան Սարգսյանը՝ լուսանկարում: Նրա հանդեպ որպես խափանման միջոց ընտրվեց ստորագրությամբ երկրից չհեռանալը: Մինչեւ դատավորի որոշումը՝ նրա պաշտպան Գրիշա Բալասանյանը հայտարարել էր, որ Սարգսյանի ընտանիքը գումար չունի, որպեսզի նրան գրավի դիմաց ազատեն:
Հիշեցնենք՝ Սարգսյանը զինված խմբի երկրորդ անդամն է, որը կալանքից ազատվում է: Երեկ նման որոշում էր կայացրել նաեւ դատավոր Մեսրոպ Մակյանը՝ Արեգ Կյուրեղյանի հանդեպ: Կալանքից ազատված են նաեւ զինված խմբին օժանդակելու համար մեղադրվող Մանվել Աթոյանը, Խաչատուր Գիչյանը, Կարո Եղնուկյանը:
2016թ. ՀՀ ոստիկանության ՊՊԾ գունդը գրաված եւ մի շարք ծանր հանցագործությունների կատարման համար մեղադրվող «Սասնա ծռեր» խմբի անդամ Տիգրան Սարգսյանն անցնում է մասնավորապես պատանդ վերցնելու և պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու և զենք, ռազմամթերք հափշտակելու հոդվածներով:
Լուիզա ՍՈՒՔԻԱՍՅԱՆ
