Հայաստանի քաղաքացիները մեծ հետաքրքրություն են ցուցաբերում Շենգենյան գոտու երկրների հանդեպ՝ չնայած ստիպված են դիմել մուտքի այցագիր ստանալու համար և հաճախ մերժվում են: SchengenVisaInfo.com կայքի տվյալներով՝ շենգենյան գոտու որոշ երկրներ ամենատարածված ուղղություններից են հայերի համար: Հայաստանի քաղաքացիներին ամենաշատը մուտքի այցագիր տրամադրում են հետևյալ երկրները՝ Հունաստան, Գերմանիա, Իտալիա, Լիտվա, Ֆրանսիա, Լեհաստան և Չեխիա:
Հայաստանի քաղաքացիներին Միասնական շենգենյան վիզա ամենաշատը տրամադրել է Գերմանիան, չնայած ամենաշատ դիմումները ստացել է Հունաստանը: Հայաստանի 15 հազար 183 քաղաքացի դիմել է Հունաստանի հյուպատոսություն՝ Միասնական շենգենյան վիզա ստանալու համար: Մերժում է ստացել ավելի քան 2000 քաղաքացի:
Միևնույն ժամանակ` Գերմանիայի դեսպանատունը նույն ժամանակահատվածում ստացել է 14 հազար 942 դիմում, մուտքի այցագիր ստացել է 13 հազար 733 մարդ:
Լիտվայի դեսպանատունը ևս դիմումների զգալի քանակություն է ստացել. 10 հազար 152 ՀՀ քաղաքացուց շենգենյան վիզա ստացել է 8 հազար 898 մարդ: Ֆրանսիան 5 հազար 963 դիմումատուից ընտրել է 4 հազար 482-ին: Լեհաստանի և Չեխիայի դեսպանատներ դիմել են համապատասխանաբար 4 հազար 523 և 3 հազար 113 ՀՀ քաղաքացի, վիզա ստացել է համապատասխանաբար 3 հազար 981 և 3 հազար 746 մարդ:
Այսպիսով, Գերմանիայի դեսպանատունը մերժել է դիմում ներկայացրած ՀՀ քաղաքացիների 7.8 տոկոսին, մերժումների ամենաշատ թիվը գրանցվել է Իտալիայի դեսպանատանը՝ 19 տոկոս:
Պատրաստեց՝ Վիկտորյա ԱՆԴՐԵԱՍՅԱՆԸ
