«Մեր ահազանգի հիման վրա են բացահայտումներ եղել»,- այսօր խորհրդարանում լրագրողների հետ զրույցում ասաց ՀՀԿ խմբակցության պատգամավոր, Երիտասարդական հիմնադրամի հոգաբարձուների խորհրդի համակարգող Կարեն Ավագյանը ՝ անդրադառնալով իր կողմից Քննչական կոմիտեին հասցեագրված դիմումին, ըստ որի ապրիլի 6-ին Հայաստանի Երիտասարդական հիմնադրամի գործադիր տնօրենը հիշյալ հիմնադրամի անունից ինքն իր հետ կնքել է 326.000.000 ՀՀ դրամի փոխառության պայմանագիր:
Եղածը Կարեն Ավագյանը համարում է ցավալի դեպք:
«Թողենք իրավապահ մարմինների գնահատականին եւ չտրվենք քաղաքական սադրանքների»,- հորդորեց նա:
Սոցցանցերում այս թեման քննարկվեց, այն համատեքստում, որ Կարեն Ավագյանն իր աշխատողին «պատստավկա» է արել։ Կարեն Ավագյանը չհամաձայնեց: Այլ հարցերի էլ չպատասխանեց:
Հիշեցնենք, որ պատգամավորի դիմումի հիման վրա՝ ՀՀ քննչական կոմիտեի Երևան քաղաքի քննչական վարչությունում նախապատրաստվել են նյութեր, որոնց արդյունքներով այսօր հարուցվել է քրեական գործ՝ առանձնապես խոշոր չափերով յուրացում կատարելու դեպքի առթիվ՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով։
Նելլի ԳՐԻԳՈՐՅԱՆ
Լուսանկարը՝ արխիվային. Հայաստանի երիտասարդական հիմնադրամի գործադիր տնօրեն Ալեքսանդր Տեր-Հովակիմյանը եւ Ռուսաստանի Դաշնության «Երիտասարդական ռեսուրս կենտրոն»-ը, Կարեն Ավագյանի մասնակցությամբ՝ ստորագրում են ռազմավարական համագործակցության հուշագիր:
