Ադրբեջանի նախագահ Իլհամ Ալիևը հույս է հայտնել, որ Հայաստանի նոր իշխանությունները «իրական քայլեր» կձեռնարկեն ղարաբաղյան հակամարտության կարգավորման համար: Ինչպես հաղորդում է «ՌԻԱ Նովոստի» գործակալությունը, այս մասին Ալիևը հայտարարել է իֆթարի արարողությանը (ռամադան ամսվա ժամանակ երեկոյան սննդի ընդունման կարգ), որը կազմակերպել էր Կովկասի մուսուլմանների վարչության նախագահ Շեյխ-ուլ-Իսլամ Ալլահշուքյուր Փաշազադեն իր առանձնատանը:
«Հույս ունեմ, որ Հայաստանի նոր ղեկավարությունը չի կրկնի նախկին իշխանությունների սխալները, լուրջ աշխատանք կիրականացնի՝ հակամարտության կարգավորման համար, և զարկ կտրվի իրական, այլ ոչ հանուն իմիտացիայի, բանակցային գործընթացի մեկնարկին: Այսպիսով, հարցը կարող է լուծում ստանալ, և Կովկասում կարող է խաղաղություն հաստատվել: Մենք ցանկանում ենք դա, մենք պահանջում ենք հակամարտության կարգավորում, մենք դրա իրավունքը ունենք։ Հուսով ենք՝ այս հարցը մոտ ապագայում կարող է լուծում գտնել բանակցությունների միջոցով»,-ասել է Ալիևը:
Հիշեցնենք, որ Հայաստանի վարչապետ Նիկոլ Փաշինյանը հայտարարել էր Ադրբեջանի իշխանությունների հետ արցախյան հիմնախնդրի կարգավորմանն ուղղված բանակցություններ վարելու պատրաստակամության մասին, այն պայմանով, եթե Արցախը դառնա բանակցային կողմ:
Պատրաստեց՝ Վիկտորյա ԱՆԴՐԵԱՍՅԱՆԸ
