Վերաքննիչ քրեական դատարանում դատավորներ Մխիթար Պապոյանի, Մանուշակ Պետրոսյանի եւ Ռուզաննա Բարսեղյանի նախագահությամբ այսօր քննվում է Շուշիի առանձնակի գումարտակի հրամանատար Ժիրայր Սեֆիլյանի եւ մյուսների վերաքննիչ բողոքը, որով նրանք պահանջում են բեկանել առաջին ատյանի դատարանի որոշումը:
Հիշեցնենք, որ այդ որոշմամբ՝ Ժիրայր Սեֆիլյանը մեղավոր էր ճանաչվել ապօրինի զենք-զինամթերք պահելու-փոխադրելու, զանգվածային անկարգություններ նախապատրաստելու եւ ռազմավարական նշանակության շինություններ, այդ թվում՝ Երեւանի հեռուստաաշտարակն ու զորամաս զավթելու փորձի համար եւ դատապարտվել 10,5 տարվա ազատազրկման: Գեւորգ Սաֆարյանը եւ գործով անցնող մյուս անձինք եւս դատապարտվել են ազատազրկման:
Նիստի մեկնարկին դատավորները հետաքրքրվեցին, թե արդյոք դատավորների դեմ ինքնաբացարկի միջնորդություններ կա՞ն: Սեֆիլյանի շահերի պաշտպան, փաստաբան Տիգրան Հայրապետյանը հայտարարեց՝ մեկ ամիս առաջ վերաքննիչ քրեական դատարանը մերժել էր Սեֆիլյանի կալանքը փոխելու եւ նրան ազատ արձակելու միջնորդությունը՝ պատճառաբանելով, թե պաշտպանի՝ Սեֆիլյանի հանդեպ քաղաքական դրդապատճառներով քրեական հետապնդումը միայն պաշտպանի ենթադրությունն է: «Բայց Հայաստանում թավշյա հեղափոխություն է տեղի ունեցել, եւ անցել են ժամանակները, երբ նախորդ իշխանությունները հրամաններ էին իջեցնում դատարաններին: Եթե հիմա դուք կհայտարարեք, որ տեղի է ունեցել հեղափոխություն, ես ինքնաբացարկի միջնորդություն չեմ ներկայացնի»,-նշեց Տիգրան Հայրապետյանը:
Դատավորները նկատեցին, որ պաշտպանի հարցադրումը քաղաքական է, իսկ դատավորներին որեւէ մեկը երբեւէ հրամաններ չի իջեցրել, դատարանը ապաքաղաքական կառույց է: Տիգրան Հայրապետյանը պատասխանեց, որ ինքնաբացարկի հնարավոր միջնորդության մասին հետագայում կհայտարարի, եթե կարիքը լինի:
Ապա դատավորները ճշտեցին՝ մեղադրյալների կենսագրական տվյալներում կա՞ն անճշտություններ: Սեֆիլյանի պաշտպան Հայրապետյանը հայտարարեց, որ կան. «Նշված է, որ նա չի աշխատում, բայց վերջին տասնհինգ տարում նա զբաղվում է ակտիվ քաղաքական գործունեությամբ, ինչը եւս աշխատանք է»: Սեֆիլյանն ուղղեց պաշտպանին՝ «հեղափոխական գործունեություն»:
Վերաքննիչ բողոքի քննության ընթացքում պաշտպաններն այսօր առաջնահերթ կալանքի փոփոխության միջնորդություններ են ներկայացնելու, այնուհետեւ տեղի կունենա բողոքի բուն քննությունը:
Մանրամասներն՝ առաջիկայում:
Լուիզա ՍՈՒՔԻԱՍՅԱՆ
