Ադրբեջանական ԶԼՄ-ների ներկայացուցիչները և Ադրբեջանի մամուլի խորհուրդը բողոքի նամակ են հղել Ռուսաստանի արտգործնախարարության տեղեկատվության վարչության պետ Մարիա Զախարովային: Ադրբեջանական մամուլի ներկայացուցիչների պնդմամբ՝ հունիսի 1-ին Ռուսաստանի ԱԳՆ տեղեկատվության վարչության պետի տեղակալ Արտյոմ Կոժինի ճեպազրույցի ժամանակ հնչած նրա պատասխանը խեղաթյուրված կերպով է հրապարակվել գերատեսչության կայքում:
Հիշեցնենք, որ Արտյոմ Կոժինի ճեպազրույցի ընթացքում ադրբեջանական Trend գործակալության թղթակիցը հարց էր տվել՝ ճշտելու Ռուսաստանի դիրքորոշումը ղարաբաղյան հակամարտության բանակցություններին Արցախի անմիջական մասնակցության մասին Հայաստանի վարչապետ Նիկոլ Փաշինյանի հայտարարության վերաբերյալ: Ընդ որում ադրբեջանցի լրագրողը Արցախի իշխանությունների փոխարեն օգտագործել էր «Ադրբեջանի օկուպացված տարածքներում ստեղծված անօրինական ռեժիմ» արտահայտությունը:
Ռուսաստանի ԱԳՆ պաշտոնական կայքում տեղադրված հաղորդագրության համաձայն՝ Կոժինն ասել է. «Ձեր ամպագոռգոռ հայտարարությունները, որոնք ԵԱՀԿ ՄԽ-ի կողմից նախանշված ռելսերի սահմաններում չեն տեղավորվում, ըստ ամենայնի, ոչ կառուցողական են»,-ասել է Կոժինը:
Ադրբեջանական Trend գործակալությունը պնդում է, որ Արտյոմ Կոժինն ի նկատի է ունեցել ընդհանրապես ամպագոռգոռ հայտարարությունները, որոնք չեն տեղավորվում ԵԱՀԿ-ի ուղենշած գծերի մեջ, ըստ ամենայնի, կառուցողական չեն:
«Հետևաբար, «ընդհանրապես» բառը փոխարինվել է «ձեր» բառով, այսպիսով` ստացվում է, որ պատասխանն իբրև թե վերաբերվել է լրագրողի հարցին, այլ ոչ թե Հայաստանի վարչապետի հայտարարությանը. . . Մենք ծանրակշիռ հիմքեր ունենք ենթադրելու, որ հայ-ադրբեջանական ղարաբաղյան հակամարտության արդիականությունը և այս հարցին Ռուսաստանի զգայուն վերաբերմունքը, ինչպես նաև Հայաստանի հետ դիվանագիտական սկանդալի հավանականությունը, Ռուսաստանին ԱԳՆ-ին դրդել են դիմել կոպիտ կեղծիքի: Այսպիսով, Ռուսաստանի արտաքին քաղաքական գերատեսչությունը ոչ միայն խեղաթյուրել է ռուս դիվանագետի պրոֆեսիոնալ պատասխանը, որը համապատասխանում է բանակցային գործընթացի իրական էությանը, այլ նաև փորձել է պատասխանատվությունն ամբողջությամբ դնել լրագրողի վրա, ով կոռեկտ և տեղին հարց է տվել»,-գրել են ադրբեջանական ԶԼՄ-ների ներկայացուցիչները Զախարովային ուղղված նամակում:
Նրանք նաև նշել են, որ այս դեպքը պատիվ չի բերում ՌԴ ԱԳՆ-ին: «Այդ պատճառով Ռուսաստանի արտաքին քաղաքական գերատեսչությունը պետք է ուղղի այդ կեղծիքը և վերականգնի ճշմարտությունը»,-գրել են նրանք:
Պատրաստեց՝ ՎԻԿՏՈՐՅԱ ԱՆԴՐԵԱՍՅԱՆԸ
