«Երեւանի կոնյակի գործարան» ՓԲԸ-ն Տավուշի մարզի առաջին ատյանի դատարան ապրանքային նշանն ապօրինի օգտագործելու, կեղծ արտադրանքը շրջանառությունից հանելու պահանջների մասին քաղաքացիական հայց է ներկայացրել ընդդեմ «Իջեւանի գինու, կոնյակի գործարան» ՓԲԸ-ի: 2017թ. նոյեմբերի 16-ին դատավոր Սիմա Իսկանդարյանը հայցադիմումը ընդունել է վարույթ:
Այդ գործով նախնական դատական առաջին նիստը Իջեւանում կայացել է 2018թ. հունվարի 23-ին: 2018թ. մայիսի 15-ին Երեւանում կողմերի լիազորված ներկայացուցիչները հաշտության համաձայնություն են ստորագրել, որով «Իջեւանի գինու, կոնյակի գործարան» ՓԲԸ-ն պարտավորվել է դադարեցնել որոշակի ապրանքային նշաններով, դրանց տարբերակներով ապրանքների օգտագործումը, վաճառքը, արտահանումը, գովազդումը, ցուցադրումը, նշված ապրանքային նշանները եւ դրանց տարբերակները հանել իր արտադրած ապրանքների կամ դրա փաթեթավորման վրայից:
Իջեւանի գինու, կոնյակի գործարանը պարտավորվել է իր կողմից արտադրվող ապրանքների, ձեւաթղթերի, հուշանվերների, այլ գույքի վրա չօգտագործել որեւէ ապրանքային նշան, որը նույնական է, կամ կարող է շփոթելու աստիճան նման լինել «Երեւանի կոնյակի գործարան» ՓԲԸ-ին պատկանող որեւէ ապրանքային նշանի: Այդ համաձայնությունով Իջեւանի գինու, կոնյակի գործարանը ստանձնել է նաեւ ապրանքային նշանների հետ կապված այլ պարտավորություններ:
Ըստ «Դատալեքս» դատական տեղեկատվական համակարգի՝ մայիսի 29-ին դատավոր Ս. Իսկանդարյանը վճռել է հաստատել կողմերի միջեւ հաշտության համաձայնության համաձայնագիրը եւ այդ հիմքով քաղաքացիական գործի վարույթը կարճել:
Ոսկան ՍԱՐԳՍՅԱՆ
