Շիրակի նախկին մարզպետ, ներկայիս ԱԺ պատգամավոր Ռոմիկ Մանուկյանի որդին՝ տնտեսագետ Թաթուլ Մանուկյանը, որը 2,5 տարի է՝ հայեցողական պաշտոն էր զբաղեցնում Շիրակի մարզպետարանում․ Շիրակի մարզպետի օգնական էր, այսօր աշխատանքից ազատման դիմում է ներկայացրել։
Այս մասին մեզ տեղեկացրեցին նրա կուսակից ընկերները՝ նշելով, որ վերջինս, մտնելով մարզպետարանի աշխատակիցների աշխատասենյակներ, ցտեսություն է ասել բոլորին։
Մենք փորձեցինք կապ հաստատել Թաթուլ Մանուկյանի հետ՝ հասկանալու, թե ինչո՞ւ է որոշել դիմում ներկայացնել, մի՞թե պատճառը նորանշանակ մարզպետ Կարեն Սարուխանյանի այն հայտարարությունն է, թե կադրային փոփոխություններ են կատարվելու մարզպետարանում, սակայն նա այդպես էլ մեր հեռախոսազանգերը թողեց անպատասխան։
Հիշեցնենք, որ Թաթուլ Մանուկյանին աշխատանքի էր ընդունել ՀՅԴ-ական մարզպետ Հովսեփ Սիմոնյանը։
Ի դեպ, Շիրակի մարզպետարանի պաշտոնական կայքից արդեն հանվել են Թաթուլ Մանուկյանի լուսանկարն ու կենսագրական տվյալները։
Նունե ԱՐԵՎՇԱՏՅԱՆ
Թաթուլ Մանուկյանի լուսանկարը՝ նրա ֆեյսբուքյան էջից
