«Եկեք Նիկոլից ավելի Նիկոլ չլինենք»,- վերընտրվելուց հետո ասաց ԵՊՀ տնտեսագիտության եւ կառավարման ֆակուլտետի դեկան, տնտեսագիտության դոկտոր, պրոֆեսոր Հայկ Սարգսյանը:
«Կարծում եմ, որ այսօր էյֆորիայի պատրանքների մեջ ենք, եթե մտածում ենք, որ ամեն ինչ միանգամից արմատախիլ է լինելու, այն բացասականը, որ տասնամյակների ընթացքում, անգամ մեր նորանկախ երկրում արմատավորված է, կարող է մեկ-երկու ամսում հիմնովին փոխվել: Դա այդպես չէ»,-հավելեց մեր զրուցակիցը:
Նրա համոզմամբ, բոլոր խնդիրների լուծումները պայմանավորված են մտածողության փոփոխություններով: Հայկ Սարգսյանն ասում է, որ այնպիսի պայմաններ պետք է ստեղծել, մարդը չփորձի հայտնվել կոռուպցիոն սխեմաներում. «Մեզ մոտ 50%-ի շրջանակում է կոռուպցիան, մինչդեռ, օրինակ, Սկանդինավյան երկրներում այդ թիվը 10%-ի սահմաններում է, որովհետեւ այդ երկրների բնակիչները գանձագողությամբ չեն զբաղվում, նրանք մտածում են, որ պետությունից գողանալը նշանակում է գողանալ իրենց ծնողներից ու երեխաներից»:
Միաժամանակ ԵՊՀ դեկանը նշում է, որ միայն ինքնաբավ երկրում կարող է լինել իրավագիտակցության բարձր աստիճան, մտածողության եւ արժեքային համակարգի փոփոխություն: «Ես այն համոզումն ունեմ ներքին, որ այս ոգեւորության ալիքն անպայման բարենպաստ նստվածք կունենա, կհանդիսանա այն հենքը, որի վրա «կվերընձյուղվի» նաեւ այն քաղաքացին, որը աղքատ չի լինի: Միշտ ասել եմ, որ աղքատ մարդը չի կարող գնալ արդար ընտրության, դեռեւս անցյալ տարի հարցազրույցներիցս մեկում նշել եմ, որ մարդկանց կենսամակարդակը կարող է բարձրանալ, եթե երկրում նոր ԱԺ լինի եւ արտահերթ ընտրություններ»,-հայտնեց պարոն Սարգսյանը:
Գոհար ՀԱԿՈԲՅԱՆ
Լուսանկարը` 168 ժամի
