«Երբ գիտության ոլորտի պատասխանատուներից մեկը երկիրը քոսոտ է անվանում, ցանկություն չի լինում գիտությամբ զբաղվել»,- այսօր խորհրդարանում 2017 թվականի բյուջեի կատարողականի քննարկումների ժամանակ հայտարարեց ԿԳ նախարար Արայիկ Հարությունյանը: Հիշեցնենք, նման հայտարարություն արել էր ԳԱԱ նախագահ Ռադիկ Մարտիրոսյանը:
ԿԳ նախարարի կարծիքով, եթե առկա ֆինանսական միջոցներն արդյունավետ ծախսվեն, կարելի է հաջողության հասնել նաեւ գիտության ոլորտում:
Խոսելով դպրոցներում դրամահավաքության ու կոռուպցիայի վերացման մասին էլ, նախարարն ասաց որ ինքը նման սխեմաներ երեւանյան դպրոցներում տեսել է. «Մեծ դրամահավաքներ են իրականացվում, երբ այս բոլորը բացվի եւ ճիշտ բաշխվի, ես ձեզ վստահեցնում եմ, որ կարող ենք հաջողությունների հասնել»:
Նախարարը կրկնեց` դպրոցների ապաքաղաքականացումը կարճաժամկետ խնդիրներից մեկն է, դպրոցների քաղաքականացված լինելը մեծ վնաս է հասցրել ոլորտին:
Նոր նախարարը կարծում է, որ «յուրաքանչյուր կրթության նախարարի հետ համակարգն այդ գույնով է ներկվել»:
Նա կհանդիպի մարզպետների, մարզպետարանների վարչության պետերի հետ եւ կխոսեն այդ խնդիրներից ձերբազատվելու մասին:
Նելլի ԳՐԻԳՈՐՅԱՆ
