Աշխատանքի եւ սոցիալական հարցերի նախարար Մանե Թանդիլյանից այսօր Aravot.am-ը հարցրեց՝ ՀՀԿ-ականները քննադատում են, որ կառավարության ծրագիրը կենացների, բարի ցանկությունների նախադասություններ են, թվեր չկան, գրել եք՝ աղքատությունը պետք է կրճատվի, բայց ոչ մի տոկոս չեք գրել, թե ինչքա՞ն, շեմը ո՞րն է լինելու: Նախարարը պատասխանեց. «Ես հիշեցի իրենց նշած տոկոսները եւ ապա պատկերը, տոկոսների հարաբերակցությունը: Այնպես որ, տոկոս նշելը չի նշանակում աշխատանք անել: Նշեմ, որ ծրագիրը ինչի մասին է, ինչու է այդպիսին՝ իրողությունների ամրագրում է եւ դրանից ելնելով քայլերի առաջնահերթություն: Այնտեղ շեշտված է, որ մեկ տարվա ընթացքում արտահերթ ընտրությունների առաջնահերթություն ենք տեսնում: Այդ առումով ՀՀԿ պատգամավորի քննադատությունը հետաքրքիր է, լավ է, բայց ցուցանիշները, որոնք նշում են ու չեն կատարում՝ շատ ավելի վատ է»:
Մեր դիտարկմանը, որ մի տեսակ բումերանգի էֆեկտով ընդդիմությանը կարծես վերադարձնում են իրենց ասած քննադատությունները՝ Մանե Թանդիլյանն արձագանքեց. «Որովհետեւ ժառանգել ենք մի իրավիճակ, որը շտկման հնարավորություն պետք է փնտրենք ու գտնենք: 25-30 տարի այն համակարգերը, որը ներդրված է ու արդյունավետ չէ, տրամաբանական է, որ մեկ-երկու օրում լուծման ենթակա չեն»:
Նախարարը վստահեցրեց, որ ներկա կառավարությունն ունի այդ կամքը եւ արդյունքները կլինեն ավելի արագ, քան թե կարելի է պատկերացնել:
Մանրամասները՝ տեսանյութում:
Հռիփսիմե ՋԵԲԵՋՅԱՆ
