Աշխատանքի եւ սոցիալական հարցերի նախարար Մանե Թանդիլյանը ԱԺ-ում լրագրողների հետ զրույցում ասաց, որ Կուտակային կենսաթոշակի մասին օրենքը կառավարության քննարկմանն է ներկայացվել. «Պատասխանը չի ուշանա, որովհետեւ բոլորը հասկանում են, որ հուլիսի 1-ից ուժի մեջ է մտնելու այլ կերպ»:
Հարցին՝ 4-5 տարի է հետաձգվում են, ի՞նչ հաշվարկներ կան, մասնագետները գտնում են, որ 65 մլրդ դրամի չափով ֆոնդերին գումար չի ուղարկվել: Նախարարը պատասխանեց, որ մտադիր են այնպիսի համակարգ ներդնել, որ հետաձգման կարիք այլեւս չունենա:
Մանե Թանդիլյանը նշեց, որ ներդրման ժամանակահատվածում սկզբունքը խաթարվել է եւ դժգոհություն է առաջացրել, դա պետք է լուծվի: Ինչ վերաբերում է ռիսկայնությանը, այո, դա ռիսկային է, բայց հանդիպումներ ու քննարկումներ են անցկացնում, որ կուտակայինը քաղաքացուն ընտրության հնարավորություն ստեղծի. «Ես միշտ ընտրության կողմնակից եմ»:
Նախարարն ասաց, որ Հայաստանում ամենավատ մոդելը չի, որ ներդրվել է, կան հետաքրքիր լուծումներ, պարզապես համակարգը պետք է լինի ընդունելի մարդկանց համար:
Լրագրողները հետաքրքրվեցին չարաշահումներից: Նախարարը պատասխանեց, որ ԱԱԾ պետի հետ են հանդիպել, քաղաքացիներից ինտենսիվ բողոքներ ու նամակներ են ստանում: Հարցին՝ կա՞ն կոռուպցիոն չարաշահումներ՝ Մանե Թանդիլյանը պատասխանեց. «Շատ հաճախ քաղաքացիները անհասցե հայտարարություններ են անում: Ես միշտ իրենց դիմում եմ՝ առաջարկելով անուններով նշել, տեղ նշել, հասցե, որպեսզի կարողանա ուսումնասիրություններ իրականացնել: Հաճախ լինում է, ստուգում ենք ու գտնում ենք, որ այդքան էլ իրավիճակն այդպես չէ»:
Նախարարն ասաց, որ չարաշահումների տեղիք է տալիս հաճախ օրենքի անհստակությունը, հստակ չափորոշիչներ չհաստատելը:
Հռիփսիմե ՋԵԲԵՋՅԱՆ
