«Ավելի խիստ պետք է լինել եւ լայնածավալ գործողություններ իրականացնել կոռուպցիայի եւ ստվերային տնտեսության դեմ: Ցանկացած բնագավառում կոռուպցիոն գործընթացներ են եղել»,-«Հոդված 3» մամուլի ակումբում լրագրողների հետ հանդիպմանն այսօր անդրադառնալով ԱԱԾ-ի կողմից վերջերս սուպերմարկետներում բացահայտած հարկերից խուսափելու կոռուպցիոն սխեմաներին, ասաց տնտեսագետ Վահագն Խաչատրյանը: «Պարզվեց, որ ոչ միայն գործարարների կողմից է դա կատարվում, այլեւ օրենքներում կոռուպցիոն ռիսկեր կան»,-համոզմունք հայտնեց Վահագն Խաչատրյանը:
Նրա գնահատմամբ՝ հաջորդ քայլը, որով պետք է կառավարությունը զբաղվի, փոքր բիզնեսն է. «Փոքր բիզնեսով զբաղվողները հիմա հայտնվել են ոչ միայն անհավասար պայմաններում, այլեւ զարմանալի է, որ կարողանում են գոյատեւել»:
Անդրադառնալով Տնտեսական մրցակցության պաշտպանության պետական հանձնաժողովի երեկվա հայտարարությանը՝ տնտեսագետն այն տարօրինակ որակեց. «Կառավարության տեղը լինեի՝ կլուծարեի այդ հանձնաժողովը: Դրա արդյունավետությունը չեմ տեսնում, միայն տարեկան 400 միլիոն դրամ իր ծախսերն է հոգում»:
Հիշեցնենք, որ ըստ ՏՄՊՊՀ-ի՝ մեծությամբ առաջին 5 խոշոր սուպերմարկետները միասին զբաղեցնում են ընդհանուր մանրածախ առևտրի 15 տոկոսը, ինչի հետ համաձայն չէ տնտեսագետը:
Ինչ վերաբերում է փաստին, որ կոռուպցիոն սխեմայի բացահայտումից հետո որոշ սուպերմարկետներ ժամանակավորապես բարձրացրին մի շարք պարենային ապրանքների գները, Վահագն Խաչատրյանը նկատեց. «Դա նշանակում է, որ մանրածախ գները ինչ-որ տեղից են սահմանվում: Անընդունելի է, որ սուպերմարկետները կարող են պետության եւ սպառողների հետ այդ լեզվով խոսել: Եթե երեք օր մենք այդ թանկացած միսն ու միրգը չառնեինք, ի՞նչ էին անելու: Այդ մարդիկ կայացել են որպես գործարար ոչ թե նրա շնորհիվ, որ խելամիտ են, այլ որ մոտ են կանգնած եղել քաղաքական ղեկավարությանը»:
Խաչատրյանն անդրադարձավ նաեւ նոր կառավարության ծրագրին. «Դրանում կան հաջողված եւ չհաջողված մասեր, բայց, ընդհանուր առմամբ, այն կարող է գործնականում կիրառելի լինել: Փաշինյանը հետ գնալու տեղ չունի: Եթե իր վրա է վերցրել կոռուպցիային վերջ դնելու առաքելությունը, պետք է մինչեւ վերջ գնա: Սպասումներն արդարացնելու միակ ձեւը կոռուպցիայի դեմ պայքարն է մինչեւ վերջ»:
Լուիզա ՍՈՒՔԻԱՍՅԱՆ
