Նեթանյահուի դեմ մահափորձ են պատրաստել. խմբավորումը չեզոքացվել է. ԶԼՄ-ներ

Իսրայելական Shin Bet անվտանգության գործակալությունը հայտարարել է, որ Արևելյան Երուսաղեմում չեզոքացրել է Սիրիայի տարածքից ղեկավարվող ահաբեկչական խմբավորումը, որը մահափորձ էր պատրաստել Իսրայելի վարչապետ Բենյամին Նեթանյահուի դեմ: Այս մասին հաղորդում է i24news կայքը:

Խմբավորման անդամներից մեկը՝ 30-ամյա Մուհամադ Ջամալ Ռաշդահը, ձերբակալվել էր դեռևս ապրիլի 24-ին: Մի քանի շաբաթ անց Shin Bet-ը ձերբակալել է ևս երկու անձի, որոնց անունները չեն նշվում:

Տեղեկատվության համաձայն՝ Ռաշդահը նախատեսել էր ահաբեկչական գործողություններ իրականացնել տարբեր թիրախների դեմ, որոնց թվում է նաև Իսրայելի վարչապետը և Երուսաղեմի քաղաքապետ Նիր Բարքաթը:

Կասկածյալը, որը իսրայելական ID ունի, մտադիր է եղել հարձակումներ գործել նաև Երուսաղեմում տեղակայված կանադական անվտանգության ընկերության աշխատակիցների, ինչպես նաև ամերիկյան հյուպատոսությանը պատկանող շինությունների դեմ:

Պատրաստեց Վիկտորյա ԱՆԴՐԵԱՍՅԱՆԸ