ՀՀ ԱԳՆ մամուլի խոսնակ Տիգրան Բալայանն այսօր լրագրողների հետ ճեպազրույցում կարեւորեց ՀՀ վարչապետ Նիկոլ Փաշինյանի՝ օրերս Վրաստան կատարած այցը եւ ՀՀ-Վրաստան հարաբերությունները որակեց որպես բարեկամական: «Փաշինյանի այցի վերաբերյալ վրացական եւ հայկական կողմերի հայտարարությունները վկայում են այն մասին, որ ՀՀ-ի եւ Վրաստանի միջեւ կա պարզ տրամադրվածություն՝ անել առավելագույնը, որպեսզի ջերմ հարաբերությունները միջպետականի մակարդակի հասնեն»,-համոզմունք հայտնեց Տիգրան Բալայանը:
Լրագրողները հետաքրքրվեցին՝ հնարավո՞ր է երկու երկրների միջեւ ստորագրվի փաստաթուղթ, որը կբացառի երկուստեք ռազմական գործողությունների իրականացումը: Բալայանը պատասխանեց. «Այս պահին նոր խոշոր համաձայնագրի կնքման վերաբերյալ տեղեկություն չկա, բայց չի բացառվում, որ ապագայում կլինի: Թե ինչ փաստաթղթեր կնախապատրաստվեն, դա արդեն ժամանակի հարց է»:
Ապա լրագրողները հարցին, թե որքանո՞վ է տեսանելի Հարավային Օսիայով եւ Աբխազիայով հայկական բեռների փոխադրումը դեպի Ռուսաստան: «Այդ հարցում կանենք հնարավորը, որպեսզի օր առաջ ճանապարհների բացումը տեղի ունենա: Հասկանալի է, որ խնդիրներ կան, բայց այդ հարցում հստակ պայմանավորվածություններ պետք է ձեռք բերվեն»,-եզրափակեց Տիգրան Բալայանը:
Հիշեցնենք, որ Ռուսաստանը եւ Վրաստանը Հարավային Օսիայի տարածքով բեռնափոխադրումներ առնչությամբ դեռ համաձայնության չեն եկել (2017-ին Հարավային Օսիայի նախագահը հայտարարել էր, որ իրենց տարածքով կարող են ապահովել բեռնափոխադրումը Ռուսաստանի և Անդրկովկասի երկրների միջեւ):
Լուիզա ՍՈՒՔԻԱՍՅԱՆ
