Ինչպես արդեն տեղեկացրել էինք Դավիթ Թադևոսյանը, ապրիլյան պատերազմի օրերին, զինծառայության է եղել Արցախում: Անսպասելի պատերազմական գործողություններից հետո նրա ինքնազգացողությունը վատացել է, և զինվորին ուղղաթիռով հասցրել են Երևան: Շուրջ 2 ամիս անգիտակից վիճակում եղել է հիվանդանոցում: Բժիշկներին հաջողվել է նրան օգնել, սակայն հաշմված զինվորի հիմնական բուժման համար այդպես էլ ո՛չ ՊՆ-ն, ո՛չ էլ այլ կառույցներ գումար չեն տրամադրում՝ անհիմն և անընդունելի պատճառաբանություններով: Դավիթի մայրը՝ տիկին Հասմիկը, թակել է գրեթե բոլորի դուռը, մի կերպ, մասնավոր ճանապարհով, որոշ բարերարներից հավաքել է 5000 եվրո գումար, սակայն մնացյալ 7000 եվրո-ն այդպես էլ որևէ կառույց չի ցանկանում տրամադրել, իսկ զինվորի վիճակն օր օրի ավելի է վատանում:
Հաղորդման ընթացքում օգտագործել ենք նաև կադրեր, որտեղ երևում է՝ ցնցումները սկսել են հաճախակի կրկնվել և ավելի երկար տևել: Եթե երիտասարդի վիճակը ծայրահեղ չլիներ և բուժման համար՝ արտասահման մեկնելը ժամ առաջ անհրաժեշտ չլիներ կազմակերպել, այս կադրերը, ելնելով էթիկայի կանոններից, գուցե չհրապարակեինք:
Ի դեպ, հաշմված զինվորի ընտանիքի անդամները, խնդրին տեղյակ հասարակական կազմակերպության անդամները որոշել են ծայրահեղ միջոցի դիմել: Վաղը՝ չորեքշաբթի օրը, նրանք կհավաքվեն կառավարության մոտ: Եթե լուծում չգտնվի, հաջորդ օրը, Դավթի հետ միասին, կգան հրապարակ: Մենք կշարունակենք լուսաբանել և ներկայացնել դեպքերի ընթացքը:
Թեմայի մանրամասները՝ տեսանյութում:
Սուրեն Սարգսյան
